البوابة
انت بلا عزر
"لاني دعوت فأبيتم ومددت يدي وليس من يبالي بل رفضتم كل مشورتي ولم ترضوا توبيخي فانا ايضا اضحك عند بليتكم واشمت عند مجئ خوفكم واذا جاء خوفكم كعاصفة واتت بليتكم كالزوبعة واذا جاءت عليكم شدة وضيق حينئذ يدعونني فلا استجيب، يبكرون إليا فلا يجدونني لأنهم ابغضوا العلم ولم يختاروا مخافة الرب ولم يرضوا مشورتي ورذلوا كل توبيخي فلذلك يأكلون من ثمر طريقهم ويشبعون من مؤامراتهم"
ملاك الموت : - لكل منا قناعاَ يرتديه يعيش به بين الناس . قناعاً يخفى وراءه الحقد والكبرياء … الشهوه والاستهزاء … الفشل والخداع… قناعا يحجب عنه الرؤيا . يرفض ان ينزعه ليظهر من خلفه الحقيقة. لكن سوف يأتي ذلك اليوم التى تسقط فيه الاقنعة رغماً عنا … زي الناس دول …اللي كل واحد منهم عاش في الحياة وهو لابس قناع
عزمي :- نرتدي اقنعتنا ونسير على الطريق
ايمان -: خطواتنا حائرة ضائعة
سناء : - ونتمسك بالاقنعة الزائفة التى نرتديها .. نضحك بها على انفسنا وعلى الحياة ومن فيها
عزمي -: نضحك والقلب في احزانه غريق ونكتشف ان شعور رؤوسنا قد بيضتها السنين
سناء -: وفجأة … تسقط الاقنعة … وتسقط احزاننا … ونتعجب مما جنيناه
سامح :- ونغمض عيوننا ونفقد الحس والادراك
مراد -: وتسقط دموعنا ونسقط معها بلا حراك .
سناء
ونعود ونسأل… اين الاحلام ؟
سماح
أين الاماني ؟
إيمان
أين الصديق ؟ …. كلها اوهام ضاعت ….اختفت
مرفت
سقطت مع الاقنعة …. على قارعة الطريق
مراد
ونمضى… نمضى كما مضى السابقون وتمحونا السنون .
سامح
ولا يبقى لنا اثر مثل الدخان … نختفى كلاشئ .
عزمي
نعم .. حياتنا في هذه الارض … خيال … دخان … بعدها نعود.
ملاك الموت
لأنك تراب … وإلى التراب تعود …
الجميع
انت مين ؟ ..
ملاك الموت
أنا اللي هانزع عنكم اقنعتكم .
الجميع
أقنعة !!!
م. الموت
عشتوا حياتكم زي مانتم عايزين .. معملتوش حسابكم ان هاييجي يوم وتقابلوني ..
الجميع
أنت مين ؟ …. أنت مين ؟…. أنت مين ؟ ….
م.الموت
أنا الموت … الموت اللي كلكم كنتوا نسيتوه … لكن..( الليلة تطلب نفس كل واحد منكم)
الجميع
لا …. مش مستعدين … مش مستعدين … مش مستعدين ….
الفصل الأول
ويدخل الجميع في دهشة وخوف ... الاضاءة خافتة....
سامح
الله ... احنا فين ياحضرات ؟ …..
مرفت
أنا عمري ماجيت هنا قبل كدا !!!!!
ايمان
انا خايفة اوي
مراد
مكان مخيف جداً
سناء
مع انه مكان مانعرفهوش … لكنه جميل .. جميل جداً … سانتيما خالص
عزمي
أيه ..؟ سانتيما خالص !!!!
مراد
ياله قوام … واحد يشوف لنا احنا فين … انا مش فاضي ..لازم اكون في البيت دلوقتى … العيال مستنينى ع. العشا .
سناء
وانا زمان بابي ومامي قلبوا عليا الدينا دلوقتى …
سامح
أنا بقى زمان الحتة بتعتى مرتاحين منى اخر راحة . اصل انا بقى الواد المشرط بتاع المنطقة ..
عازمي
اصحابي على القهوه مستنينى .. زمانهم دلوقتى بيقولوا أنى انسحبت من دوري الطاولة …
ايمان
وأنا ..أنا لازم اكون في المستشقى دلوقتى … كل دقيقة بتمر بتتسبب في موت عيان .
مراد
كل دقيقة بتمر بتكلفنى آلاف الجنيهات .
مرفت
انا بقى الوقت مايفرقش معايا .. ومعتقدش ان في حد ممكن يفكر انه يسأل عنى
مراد
ياجماعة … واحد فيكم يتحرك .. يعمل حاجة … انا مش فاضي .. العيال
عزمي
مستنيني على العشاء
مراد
بالضبط .. ولازم دلوقتى اكون في البيت
سامح
في البيت … هاأأأأأأأأو … أنا بقى والحمد لله ماليش بيت … أي حارة في الحتة بتعتنا تبقى بيتى … وأي رصيف فيها يبقى سريري …
سناء
أنت بتنام على الرصيف … الله … دى حاجة اورجينال خالص … سنتيما جداً ..
سامح
اورجينال ؟!!!!..... أورجينال يعنى ايه .!؟؟؟؟ أهو انتى اللي سيتين اورجينال … ما تتكلمي عربي زينا يابت انتى يابت …
سناء
يامامي انت بتزعق في كدا ليه ؟
ايمان
سناء … سناء فكري مش كدا …
سناء
الدكتورة ايمان ! انتى ايه اللي جابك هنا .؟
ايمان
مش عارفة … لكن اللي اعرفه دلوقتى ….
عزمي
اللي اعرفه دلوقتى … انى لازم اكون على القهوة .
مرفت
ياترى المشرفة في الملجأ … بتقول علي ايه دلوقتى …
سامح
ملجأ… هو حضرتك بلا قافيه ساكنه في ملجا؟ …
مرفت
أنا مرفت … وعيت ع الدنيا لقيت نفسي في بيت ملجأ
سامح
وأنا بقى .. سامح … سامح وبس .. معرفش سامح ايه .. لكن الناس بيقولوا عليا سامح الفهلوي .. الواد اللي هوه … الفلنتينوه يعنى ..بتاع كله
مراد
هاهاها..مراد ساويريس… من رجال الاعمال… وصاحب شركة استيراد وتصدير .
عازمي
أنا بقى عزمي سيحا عزمي ..من رجال المعاشات .. والدي يبقى المرحوم سيحا عزمي كان باشا سابق ..أما جدى بقى ..
مراد
أنت هاتحكلنا تاريخ حياتك … يااخي .. يااخي انا مش فاضي . … العيال
سامح
ايه مستنينك على العشا…
مراد
لاء … زمنهم ناموا ..
سناء
أنا ابتديت اخاف …عايزة اروح…مامي عملالي بارتي النهادرة …وعازمه فيه كل اصحابي ..وبابي اشترالي بالمناسبة دى حتة فستان … انما ايه ..يجنن …
عزمي
اه … سانتما خالص …
مراد
مافيش حد فيكم معاه بطارية .. ولاعة… كبريت حتى … على الاقل نعرف احنا فين .
سامح
أنا معايا كبريت
مراد
وساكت من الصبح!!!!
عزمي
بنى ادم غريب
سامح
(يشعل سامح الكبريت) الله ... دا مكان مهجور .زي مانكون في صحرا
مرفت
صحرا!!!
ينطفأ الكبريت ويشعل غيره
عزمي
انت بتقول ايه
ايمان
وايه اللي هايجبنا مكان زي دى!!
مراد
الراجل دى بيخرف
سامح
كفاية دوشا...استنوا ... انا سامع صوت رجلين...
( ينطفئ الكبريت ويولع ثاني )
يدخل موكب جنائزي من اربعة افراد حاملين نعش يصلوا إلى خشبة المسرح ويتوسطونه
سامح
دى جنازة !!!...
ايمان
دا اكيد المريض اللي عملناله عملية امبارح .. كانت حالته خطيرة... الله يرحمه ...
مرفت
انا عمري مارحت جنازة قبل كدا
سناء
جنازة !!! الله منظر شاعري جداَ .. سانتما خالص
(يقترب الموكب )
عزمي
اسألهم ياسامح...يمكن يدلونا على السكة ...
سامح
لو سمحتوا ... احنا مش عارفين جينا هنا ازاي ...
مرفت
طب ممكن توصلونا ... معاكم عربية ؟؟؟؟
ايمان
هما مش بيردوا علينا ليه ؟
مراد
طب الجنازة دى بتعات مين ؟؟؟؟
سامح
دول كأنهم مش شايفنا ... ولا سامعنا ...
سناء
زي مانكون ارواح بالنسبة لهم ..
( يغادر الموكب المسرح ويدخل ملاك الموت )
ايمان
مين دا ؟؟
مرفت
وانا ايش عرفني
سناء
يامامي دا شكله يخوف اوي ....
عزمي
بالعكس ياانسة .. دا حتى شكله رقيق ... سانتما خالص ...
مراد
هو ده وقت هزار .. ياللا... واحد فيكم يسأله عن اسمه ... خلينا نخلص ..
سامح
ماتسأله انت يافتك ...
مراد
فتك .. طيب .. انا هاسأله .. هو انا يعنى هاخاف منه وللا ايه .. هاسأله .. تعال معانا ياستاذ عزمي ...
عزمي
لا ياعم روح انت لوحدك ...
سامح
ياراجل روح معاه ماتبقاش جبان كدا . ...
ايمان
ياجماعة حد فيكم يروح يتكلم معاه .. مش معقول كدا ..
سناء
ماتروح تكلمه يااستاذ مراد
عزمي
ايه يااستاذ مراد .. روح كلمه .
مراد
لأ .. انا ماليش دعوى بالحكاية دى .
سامح
احسن حاجة ان اكبر واحد فينا هو اللي يكلمه ...واكبر واحد فينا سناً هو الاستاذ عزمي
مراد
فعلاً ... الاستاذ عزمي هو اكبر واحد فينا .. كلمه يااستاذ عزمي ... عشان خاطرنا ... ايوه كلمه يالا....
عزمي
ياجماعة انا راجل كبير وصحتى ماتستحملش ...
الجميع
عشان خاطرنا يااستاذ عزمي .. عشان خاطرنا ...
عزمي
حاضر .. حاضر ... ممكن لو سمحت ياأخ تقولنا احنا فين ؟؟؟
م. الموت
هاهاها.....انتو لسه بتسألوا .. انتو هنا في نهاية الطريق ... اخر الخط ... المحطة الاخيرة ...
سامح
حلو اوي المحطة الاخيرة دى ياسكلانس ... يعنى ايه بقى عشان انا مش فاهم !!!
م. الموت
يعنى انتو كلكم حياتكم انتهت ... وهاتقعدوا هنا لغاية لما يجي يوم الحساب .. لانكم متم .
الجميع
متنا !!!!!؟؟؟؟؟؟
مرفت
مش ممكن ؟؟؟
مراد
مش معقول !!!
عزمي
متنا ..
سامح
طب ازاي ؟؟؟
ايمان
امبارح....
سناء
امبارح كان عيد ميلادي
ايمان
رحت المستشفى ..
سناء
طلبت من بابي يجيبلي عربية جديدة ...
ايمان
لفيت على كل العيانين ... واحد منهم كان تعبان اوي .. بصلي وقالي...
سناء
قالي .. مانتى عندك العربية بتاعتي استعمليها ... قلت له لأ ياسيدي انا عايزة عربية لي لوحدي .وتكون احمره ... وبعدين ...
ايمان
وبعدين ... حسيت بشوية تعب ... اخدت قرص اسبرين ونمت .
سناء
وصرخت وزعقت .. ورميت الزهريات على الارض .. علشان تيجي الحاجة اللي انا عايزاها . لكن ...
ايمان
لكن مافتكرش انى كنت تعبانى لدرجة انى اموت ...
م.الموت
الموت يا دكتورة..مابيستناش الواحد لما يتعب أو يمرض الموت بيخبط على الباب في أي وقت.. لأنه يأتي كلص .. فاسهروا اذا لأنكم لا تعرفون الوقت ولا الساعة
سناء
ولما جبت العربية فرحت بيها خالص ...
م. الموت
لانك انسانة مستهترة .. ركبتى العربية مع انك مابتعرفيش تسوقي .. فاتقلبت بيكي وجيتى هنا . ..
سناء
ماكنتش اعرف ان العربية اللي طلبتها هيكون فيها نهايتي ..
عزمي
انا بقى مش فاكر أي حاجة من اللي حصلي .
مرفت
لكن انا فاكره كويس ..
عزمي
افتكرت دلوقتى... كان المفروض اننا نكمل الدوري بتاع الطاولة . وكنت مصمم ...
مرفت
كنت مصممة انى اتخلص من حياتي ...
عزمي
صحيت من بدري ولبست هدومي ..
مرفت
ونزلت روحت الاجزاخانة .. واشتريت حبوب منومة
عزمي
حسيت انى مش قادر اقف على رجليه .. وبعد كدا
مرفت
بعد كدا ماحستش بحاجة خالص .. ولما فقت ...
عزمي
ولما فقت .. لقيت نفسي في المستشفى .. ولكن الدكاترة طمنوني ...قالولي كلها يومين ..
مرفت
كلها يومين وتخفي ... ولكن انا مكانش عندي أمل ..
عزمي
ماكنش في فايدة ..
مرفت
بس احسن حاجة .اننا موتنا .
عزمي
ياسلام .. مبسوطه اوي حضرتك ..
مرفت
على الاقل الواحد استريح من الدنيا ... من الناس .. وعرف مصيره ونهايته ... الدنيا مافهاش غير التعب ..
م. الموت
عمرك يامرفت ماهتلاقي الراحة... لانك كنتى بعيدة عن ربنا ونسيتى صوته اللي قال "تعالوا إلينا ياجميع المتعبين والثقيلي الاحمال وانا اريحكم "
عزمي
أحنا متنا ؟؟؟ لأ .. مش ممكن نكون موتنا.
م. الموت
أحنا موتنا .. بتجمع .. خوفك من الموت بيخليك تجمع ..
عزمي
ماهو انا مش ممكن اكون مت من غير مااستعد.
م. الموت
ايوه ...تستعد .. تصلي لربنا ... تبكيله شوية ... وتوعده انك اول ماتخف هاتوب وترجعله .. وبمجرد ان ربنا يشفيك..ترجع تاني للقهوه والطاولة ... وشلة الانس اياها وعموماً اذا كنت مش مصدق انك مت ... اتفضل اقرا.. اقرا وسمعهم ... نعيك في الجرنال ...
عزمي
انتقل إلى الامجاد السماوية .. المرحوم المقدس .. عزمي سيحة عزمي ، نجل المرحوم سيحة عزمي الباشا السابق، وحفيد المغفور له سيحة سيحة عزمي .. وحفيد حفيد عزمي سيحة سيحة عزمي....وشقيق كل من خيرت سيحه عزمي من اصحاب العمارات الكبيرة اوي وسمير سيحه عزمي من اصحاب الفلوس الكتيرة اوي ، ورأفت سيحه عزمي من اصحاب الاراضي الكبيرة اوي، وابن عمر عزمي فهمي من الاعيان وعزمي باشا من البشوات وعزمي بيه من البهوات وعزمي افندي من الافندية ، وعزمي حاف من الحفيين ، وابن خالة كلا من عزمي نخلة وعزمي البلد وعزمي الخيمة وعزمي بقرية عزمي وعزمي بميت عزمي وعزمي ببلدة عزمي وعزمي بكفر عزمي وعزمي بكوم عزمي ... هذا وستشيع الجنازة باذن الله في تمام الساعة التاسعة مساءا والعزاء بمنزل 19 بحارة عزمي المتفرع من زقاق عزمي الواقع في شارع عزمي من امام عمارة عزمي ... ولاعزاء السيدات عشان بيعيطوا أو يولولوا وبيعملوا حاجات مش كويسة .... سقط سهواً .. ان المرحوم كان قريب كل من حسبله وخيرالله ونعمةالله وسعدالله وكله على الله . نعي اصدقاء القهوة :ـ "الوداع ياعزمي .. .ياصديق العمر ياعزمي يالي كنت اجدع واحد في شلتنا ياابو العزايم .. مين من بعدك هايدفعلنا الحساب ياعزومة .. يارب تخش الجنى يارب.. يارب تروح النعيم يارب .
م. الموت
وطبعا الدعوتين اللي في الاخر دول مش هاينفعوك ...
مراد
انا بقى لا يمكن اكون مت... كل اللي انا فاكره .
سامح
كل اللي أنا فاكره ..إني كنت راكب عربية مع راجل مقاول كبير
مراد
كنت من اسكندرية بعد ما عملت صفقة هناك... صحيح
سامح
صحيح .. انا كنت اول مرة اشوف المقاول دى ... لكنه وعدني انه هايشغلنى معاه ويمكن ...
مراد
يمكن كنت سايق العربية بسرعة شوية .. مع ذلك انا حاولت ..
سامح
حاولت اقنعه يهدى السرعة شوية.. وغلبت اقوله ..يابيه .. ياسعادة البيه .. احنا كنا هانروح في شربة مايه .. بصلي وقالي ...
مراد
ماقدرش .. ماقدرش اهدي السرعة ... العيال مستنينى على العشاء .. ثم ان العربية
سامح
العربية كانت ماشية زي الطيارة .. وبعد شوية ..
مراد
وبعد شوية .. حسيت انى تعبان ... وكنت تعبان فعلاً ... عنيا غمضت ثانية . . ثانية واحدة بس ...بس كدا ماعتقدتش اموت .
م. الموت
ماتعتقدش ... واحد سايق العربية في الطريق الصحراوي ... بسرعة 180 كم وينام من كتر التعب على الدريكسيون .. وبعد كدا تقول انك ماتعتقدش انك تموت ..
سامح
هو انت اللى قتلتنى ياظالم ... انا لازم اخلص عليك..
م. الموت
تخلص عليه..؟؟ ما خلاص.. انتوا الإثنين حياتكم انتهت.. وهنا بقى بالذات مفيش حد بياخذ حقه بإيده.. انتوا خلاص.. كلكم كانت ليكوا فرصة على الارض لكن.. مافيش ولا واحد منكم استثمر وزناته.. كل واحد منكم راح ودفن وزنته في التراب.. ( ولأجل هذا اخذت منكم الوزنه.. وستعطى لأخر.. لأن كل من كان له يعطى فيزداد.. وأما من ليس له فالذي عنده يؤخذ منه) كلكم كنتوا عبيد بطالين.. ((وستطردوا إلى الظلمة الخارجية.. هناك يكون البكاء وصرير الاسنان ))
مراد
كلنا هانروح الجحيم ..
سناء
النار .. يامامي ..
سامح
ياما اتمنيت الشر لغيري طول حياتي
ايمان
ياما كتبت ادوية ممنوعة أو منتهية عشان الفلوس ..
مرفت
نسيت ربنا وسرقت فلوس من الملجأ ..
عزمي
انا عمري مارضيت ربنا مرة واحدة في حياتي
مراد
ضيعت عمري كله ونسيت ... نسيت افكر في ربنا ولو للحظة .
سناء
كنت مستهترة وماكنش بيهمني حاجة في الدنيا غير نفسي وبس ..
سامح
زرعت الرعب والخوف في قلوب الناس اللي عرفتهم .
ايمان
اتخليت عن الفقراء ورفعت سعر الكشف .
مرفت
هربت من الملجأ وبعدت عن ربنا
م. الموت
كلكم كنتوا بعيد عن ربنا. .. بقلوبكم وعقولكم .. برغبتكم وإرادتكم .. انتم اللي اخترتوا طريقكم ومشيتوا فيه لحد النهاية .
عزمي
ياااه .. بس لو ربنا أداني صحة .. كنت عرفت اخدم واعيش معاه .
مراد
لو ربنا ما خلقنيش غنى ... كنت بقيت راجل فاضي . .. كنت لقيت وقت اروح فيه الكنيسة .
سناء
لو كان ربنا يرزقني بأم غير امي .. أكيد ماكنتش هابقى مستهتره
سامح
لو كان ربنا خلقنى انسان زي بقيت الناس .. وكان ليا عيلة واصحاب .. اكيد كنت هابقى انسان تاني .
ايمان
ياه ... لو ربنا يدينى فرصة ثانية..
مرفت
لو كان ربنا خلقنى في ظروف احسن من كدا .. كنت اكيد هابقى انسانة ثانية .
مراد
لو كان ادالي وقت ..
عزمي
الوقت كان ممل .. لو كان ربنا اداني ولد يمكن كنت اتسلى بتربيته ورحت الكنيسة.
سناء
ياسلام يااخي ... لو كانت ظروفنا احسن من كدا كنا رحنا الجنة على طول.
سامح
لو ..
م. الموت
قولوا .. كملوا ... كملوا اعذاركم .. بس للاسف ... الاعذار دى كلها مش هاتنفعكوا ... لان فات اوانها .
سامح
بصراحة بقى .. دا حرام .. مش خسارة الواحد يموت كدا على طول ... حرام ..حرام .
م. الموت
حرام ...!!! هو انت مش كنت طول عمرك مستني انك تموت ....
سامح
اموت ... صحيح ... صحيح انا طول عمري كنت بتمنى انى اموت لكن ... لكن كان عندي امل ... ايوه ... ولسه عندي أمل جوه في قلبي ... كنت كل يوم احلم بشجرة عالية ... عالية اوي فروعها في السما... وانا بحاول اطولها ... بحاول امسك أي غصن فيها ... اتعلق بيه ... لكن مش قادر ... مش قادر لان الشجرة كانت عالية فوق .. فوق اوي ... وانا تحت .. وعيون الناس وضحكهم .. ونظراتهم الخبيثة كانت بتطاردني في كل حته .. كلهم .. كلهم كان محيرهم سؤال واحد .. ياترى انت ابن مين يا سامح .. ابوك مين ... اسمه ايه ... وامك فين .. انت لقيط ياسامح .. لقيط ... لقيط ... لقيط ...
م. الموت
اد ايه الانسان دا جاحد ونساي ... رغم انك نسيت ربنا لكن ربنا مانسكش .. "لان كل شعره من رؤوسكم محصاة " .. فاكر المقاول اللي بعتهولك ربنا عشان تشتغل معاه وتكسب من مهنة شريفة ... كان ممكن تسافر معاه .. وتعيش في بلاد ثانية .. وتبدي حياتك من جديد وسط ناس ماحدش فيهم يعرفك .. لكن انت اللي مارضتش
سامح
مارضيتش ... عارفين المقاول ده كان عايز يشغلنى معاه بكام ؟ بعشرة جنيه في اليوم !! انا مش أقل من زمايلي .. اللي الواحد فيهم كان بيخبط الخبطة من دول ويطلع بكام باكو في يوم واحد .. ياخسارة باواد ياسامح .. كان فاضلك همسه وتخبط خبطتك .. لكن خبطة الموت كانت اسرع .
مرفت
لكن برده احنا اتظلمنا في حياتنا .. لا أب ولا أم .. ولا عيله .. وانا .. انا كل البنات حواليا كانت بتلبس وتخرج وتتفسح وتحط مكياج .. إلا انا .. إلا مرفت نصحي . كانت المشرفة قاسية علينا اوي .. .كان كل يوم يقف واحد من المشرفين في الملجأ .. ويكلمنا ويقولنا ينبغي ان نبحث عن السلام الداخلي ... ينبغي ان نبحث عن الحب .. هيهي..وهما كانوا ابعد ناس عن السلام .. وأخر ناس ممكن تعرف يعنى ايه حب ...
عشان كدا سرقت .. ايوه سرقت الملجأ .. وهربت .. وخرجت للدنيا .. ولقيت ناس كلهم وحوش .. مجردين من الادمية .. غيلان مسعورة ... غابة الكبير فيها بياكل الصغير .. كل واحد فيهم ماشي بمبدأ دوس على اللي تقدر عليه .. والعب باللي تكسب بيه .. ساعتها الدنيا ضلمت في عينيا .. مابقتش شايفة حتا تحت رجليا .. كل حاجة حلوة ... بقت مرة ... النور ... النور نفسه بقى ضلمة .. ضلمة
م. الموت
هو دا عيبك .. انك دايما كنتى بتبصي في القزى اللي في عيون غيرك ..مفكرتيش ابدا انك تبصي للخشبة اللي في عينك انتى... المشرفة كانت قاسية.. المشرفين ماكانوش بيعروفوا معنى الحب ... طب وانتى ... انتى عرفتى معنى الحب أو معنى السلام... لو كنتى عرفتيه ماكنتيش سرقتي الملجأ وهربتى .. ماكنتيش نسيتى ربنا
مرفت
انا نسيت ربنا لأنة هو نسيني ..
م. الموت
ربنا ما بينساش حد .. لكن احنا اللي بننساه أو بنتناساه... وبعدين نرجع نقول انه نسينا ..
سناء
لو سمحت يا أونكل موت .... انا مظلومة خالص .. ربنا رزقنى بأم مافيش حاجة تهمها إلا المظاهر وبس .. كل يوم سهر وحفلات وعزومات ... بابي كان بالنسبة لي آلة بتجيب فلوس وبس ... مالقتش قدامي حد يرعاني أو يوجهنى .. وطبعاً كنت مغرورة .. طلعت لقيت نفسي غنية .. بابي راجل مهم اوي ... فوق .. فوق .. والناس كلها تحت .صغيريين ...صغيرين اوي .. كنت عايشه بين السما مع النسور .. النسر اللي كان بيخوف الناس كلها كنت ساكنه معاه فوق .. لكن في لحظة .. في لحظة لقيته بيزقنى بيوقعنى تحت . . ولقيت نفسي بصرخ واقول .. مش عايزه انزل تحت .. عايزة افضل فوق .. عايزة افضل فوق ..فوق..
م. الموت
بالرغم انك كنتى عايشه لوحدك .. لكن ربنا برضوا ما سبكيش .. فاكره .. فاكره زميلتك في المدرسة اللي ربنا بعتهالك علشان تساعدك وتقربك منه ... كانت دايما بتكلمك عنه وعن الكنسية وعن الاجتماع .... ولكن غرورك وكبريائك خلاكي تتريقي عليها وعلى لبسها. وطردتيها من البيت .. انتى كنت عايشة فوق مع النسر .. كنت بتشوفي الناس صغيرين اوي .. ونسيتى .. نسيتى ان الناس هما كمان كانوا بيشفوكي صغيره اوي ..
سناء
يعنى ايه ؟ خلاص !! خلاص هافضل هنا لوحدي ...بعيدة عن بابي ومامي واصحابي .
م. الموت
انتى عمرك ما هاتبقى لوحدك ..في تلاتة أصدقاء ليكي كانوا معاكي.. الاول سابك في اول الطريق .. ودا كان المال .. والثاني سابك على باب القبر .. ودول كانوا الناس اللي ودعوكي .. والثالث .. اللي عمره ما هيسيبك هو اعمالك..
سامح
سيبك منهم وخليك معاي انا ... دول كلهم كانوا عايشين عيشه مفيش بعد كدا وجايين دلوقتى يعيطوا ... لكن انا .. انت تقدر تقَدّر ظروفي كويس ... لانك عارف المجتمع اللي كنت عايش فيه ... والفقر اللي جابني هنا
مراد
لأ .. الفقر مش سبب يخليك تبعد عن ربنا .. اوعوا تبصولي على اني غني يعنى لازم ارضي ربنا .. لأ..انتوا ما تعرفوش العيال وبلاويهم .. دا غير مراتي .. وربنا رزقني بحتة حماة .. متعتها الوحيدة في الدنيا انها تنكد علي الصبح وبليل .. كله كوم ,وأبنى الكبير اللي يادوبك واخذ بكالوريوس فنون جميلة .. وعايز يتجوز .. كوم ثاني ..
عزمي
هو جيل الايام دي كدا .. شباب فاسد.. مابيفكرش غير في الجواز وبس ..
مراد
ولا الواد الثاني ياسيدي ... عامل فيها متدين وبتاع كنيسة .. بيروحها كل يوم .. لكن مابيرضاش يحضر القداس .. مش عارف بيقعد يعمل ايه .. ولا الواد بتاع الثانوية العامة .. كتب خارجية .. دروس خصوصية .. مجموعات تقوية .. ظهري اتقطم من كتر مصاريفه .. ومع ذلك بقاله اربع سنين في الثانوية العامة ومخدهاش .. ولا البنات ... البنات يااستاذ عزمي .. كلهم من عينة الست سناء ..
سناء
حلويين كدا ياانكل .. مافتكرش ..
عزمي
اذا كانوا صحيح زي سناء .. يبقوا اكيد زفتيما خالص ..
مراد
ماكنش عندي أي وقت اروح فيه الكنسية.
م. الموت
المشكلة الازلية اللي بتتحججوا بيها دايما ( الوقت ) . ..ماكنش في وقت .. مع انك لو طلبوك في التليفون عشان تعمل صفقة في اسوان وانت في اسكندرية .. هاتسافر في اقرب طيارة .. المشكلة مش مشكلة وقت .. المشكلة مشكلة قلب .. قلبك كان فين .. جاوب .. اقولك انا .. العالم كان عايش في قلبك .. لانك زي ماقال الكتاب .. ( لان كل ما في العالم.. شهوة العيون .. وشهوة الجسد... وتعظم المعيشة.) وانت كنت بتدور على تعظم المعيشة ... عايز تليفزون ملون .. وفيديو . .وستيريو.. وتكييف .. عايز العمارة تبقى اثنين .. عايز الرصيد يزيد في البنك .. وسط دا كله ربنا ماكنش له وجود في حياتك .. نسيته خالص .. عايش في العالم وشهواته جواك .نسيت كلام الانجيل " العالم يمضى وشهواته تزول .. أما من يصنع ارادة الله فهذا يثبت إلى الابد" .. وفضلت تكبر وتعلى وتكنز في المخازن. .. .زي الغنى الغبى بالضبط .. وقلت لنفسك " يانفسي افرحي لان لكي خيرات كثيرة موضوعة لسنوات عديدة " فاستحقيت انك تسمع الصوت اللي قال " ياغبي .. في هذه الليلة تطلب نفسك منك "
ايمان
انا اكثر واحدة مظلومة فيكوا .. مافيش حد عاش الظروف اللي انا عشتها .. اوعوا تقولوا علي اني علشان دكتورة يبقى لازم ارضي ربنا .. لأ.. انا اتربيت في اسرة صغيرة فقيرة .. ابويا كان موسيقار مغمور.. تعب معاي كتير لحد ما دخلت الجامعة.. وفي يوم ..وفي يوم رجعت البيت لقيت العود واقع من ايده على الارض وايده ماسكة الريشة .. جريت واترميت في حضنه .. ومسكت ايده ورفعتها فوق وسبتها .. لكنها فضلت جامدة ... كان خلاص .. كل شئ انتهى .. ومات ...مات
مرفت
طب ومامتك ..
ايمان
ماما ماتت وهي بتولدني ..
سناء
ياحرام .. مسكينة .. انتى حكايتك عاملة زي روايات يوسف وهبي بالضبط..
ايمان
كان لازم اروح الكلية الصبح.. واشتغل بعد الظهر عشان اغطي مصاريفي .. كافحت .. ونجحت واتخرجت ..وفتحت عيادة .. لكن ماكنش في عيانين بتجيلي .. عارفين ليه .. عشان الكشف كان بخمسة جنية ... يا بلاش .. والغريبة لما عملت الكشف بعشرين جنية .. ابتدت الناس تجي ... ولما عملتها بخمسين جنية .. ابتدت الناس تزيد اكتر واكتر .. ولما رفعت الكشف لغاية ميت جنية بقت العيادة مش مكفية .. والحجز عندي لشهورقدام
عزمي
اسألينى انا عن الدكاترة وبلاويهم .. العيان بيكشف في العيادة بسعر... العادي بسعر والمستعجل بسعر ثاني .. وفي البيت بسعر.. الدكتور منهم يعمل العملية ببنج بكذا .. ومين غير بنج بكذا..
ايمان
المريض لما كان بيدفع ميت جنية بيحس انه هايخف .. بالرغم من كدا مقدرتش استمر في النجاح كتير ..
م. الموت
نجاح الشهرة والمجد .. عمرك في يوم ما بصيتى للعيان عشان تشفيه .
ايمان
ابداً .. انا ضيعت عمري كله عشان هدف واحد ... هو اني ارسم باستمرار الامل على وش كل مريض.
م. الموت
كملي الجملة يادكتورة .. انتى كنت بترسمي الامل على وش كل مريض غنى
ايمان
طب ما الفقرا كانت قدامهم العيادات الخيرية .. يعنى انا ماليش دعوة بيهم .
م. الموت
البيت والظروف اللي عشتي فيها كان مفروض تخلي في قلبك حب ناحية الفقراء .
ايمان
صدقنى انا حاولت اكون انسانة كويسة .. لكن ...
م.الموت
لكن... كلمة جديدة اخترعها العصر الحديث عشان كل واحد يبرر بيها تصرفاته .. لكن الظروف.. لكن الوقت .. لكن المشغوليات .. لكن الفلوس.. ونسينا .. نسينا ربنا.. نسينا الدينونة .. نسينا يوم الحساب ..
عزمي
كل الكلام اللي هما قالوه ده كلام فارغ.. مافيش حد فيهم عاش وشاف اللي انا شوفته... دا مافيش مرض إلا وجاني .. ومافيش دوا الا وخدته .. ومافيش دكتور ألا وروحتله ... رحلة المرض اللي انا عشتها .. كانت رحلة كلها الم .. ثلاثين سنة .. ثلاثين سنة وانا بتعذب .. ثلاثين سنة وانا محروم .. كنت اجيب الاكل من بره .. لكن ماقدرش اكل ... الاكل ممنوع.. الشرب ممنوع .. الخروج ممنوع .. كل حاجة ممنوعة.. عشت في غربة .. وكانت القهوة هي عزائي الوحيد.. وسريري كان هو شريكي في رحلة المرض .. والحرمان كان صعب اوي علي .. حتى العيال ربنا حرمني منهم .. حاولت اعيش في فرح وهنا .. لكن قلبي كان بينزف الم .. الم
م.الموت
إنت صحيح كنت مريض في آخر أيام حياتك.. لكن انت نسيت أيام زمان..أيام شبابك والشلة إياها.. كل يوم سهر لوش الصبح..تشرب سجاير مايضرش..تشرب خمرة مافيش مانع..وكانت النتيجة المرضاللي عانيت منه لما كبرت..انت جنيت نتيجة غلطتك انت.. كلكم.. كلكم جنيتوا نتيجة أخطاؤكم.. ربنا خلقكم أحرار و إداكم فرصة تستغلوا فيها حريتكم..لكن انتوا..لفيتوا الحبل حوالين رقابكم لغاية لما خنقتوا نفسكم بيه..انتوا ضيعتوا فرصتكم بإديكم ..
سامح
طب إدينا فرصة تانية
مرفت
أه.. فرصة واحدة بس
مراد
نزلني الأرض تاني
عزمي
بس في ظروف غير دي
إيمان
وأنا هاثبت لك إني هابقى إنسانة كويسة
سناء
أيوة.. الله يخليك يا أونكل موت
سامح
يا سلام لو تديني عيلة
مرفت
هاتشوف أنا هاعمل إيه
مراد
لو تنزلني الأرض من غير مسؤوليات
عزمي
و لو تديني صحتي
سناء
ولو تديني أم غير أمي و مبقاش متدلعة و مستهترة
مرفت
ولو تديني حرية أعمل اللي أنا عايزاه
مراد
آآآآخ...لو أكون فاضي و ماعنديش بيت ولا عيال
إيمان
و لو الفلوس ماتبقاش مشكلة في حياتي
سامح
ولو الناس تحترمني
سناء
الله يخليك نزلنا الأرض
عزمي
ولو شهر واحد
مراد
ولو أسبوع واحد
مرفت
ولو يوم واحد
إيمان
ولو ساعة واحدة
سامح
ومتخفش مش هنقول إن في كوسة عندكم هنا
م.الموت
و لا ميت فرصة هتنفعكم.. ومع كدة أنا.. أنا هاديكم فرصة..مش يوم ولااتنين زي ما انتوا بتطلبوا.. مش شهر ولا شهرين زي ما انتوا بتحلموا.. لأ ..هاديكم فرصة عشر سنين.. بس بشرط.. هاتكونوا طول المدة دي تحت عنيا..هاجمعكم كلكم في شركة واحدة..هي شركة الأزياء الجاهزة..... أنتي يا عزمي.. هاترجعلك صحتك.. و هاتكون المدير العام للشركة.. وانت يا مرفت هتبقي حرة.. تلبسي و تخرجي و تتفسحي زي كل اللي في سنك وهتبقي سكرتيرة الشركة..أما انتي يا إيمان .. الفلوس مش هتبقى مشكلة في حياتك لأنك هتكوني مسؤولة عن قسم الأزياء..و انت يا سامح..الناس كلها هتحترمك..وتنسى إنك لقيط و هتبقى المديرالمالي للشركة.. أما انتي بقى يا ست سناء.. فهتنسي الدلع و تبقى ليكي شخصية مستقلة و هتكوني العقل المدبر في الشركة.. مفضلش غيرك يا مراد بيه..أنت بقى هتكون فاضي خالص زي مانت عايز... و مش هيكون عندك مسؤوليات..لأنك هتكون فراش الشركة..
واللآن..فلتقف عجلة الزمان.. وتعود عقارب الساعة إلى زمن النسيان..و تنفك قيود الموت وتنفتح القضبان..ولتسكن الحركات..وليصير الكل خليقة جديدة.. و سيحكم بيني و بينكم في النهاية الزمان..و بعدها.. أنت بلا عذر أيها الإنسان..أنت بلا عذر أيها الإنسان ..
الفصل الثاني
إيمان
إيه ده يا سامح ..انت هنا ز عزمي بيه قالب عليك الدنيا
سامح
طيب قولي صباح الخير الأول..
إيمان
صباح الخير يا سيدي
سامح
إيه يا إيمان جرى إيه ..الدنيا اتهدت ولا إيه
إيمان
عزمي بيه عايز يعرف أرباح الشركة وصلت كام
سامح
طب و أنا دخلي إيه في الموضوع ده
إيمان
يا سلام عليك يا أخي..أنت نسيت إنك المدير المالي للشركة
سامح
أهو ده الشيء الوحيد اللي مش ممكن يتنسي..بس هو فين عزمي بيه.. ماهو مش معقول كمان إن المدير العام يراجع أرباح الشركة في حمام السباحة
إيمان
إيه ده..هو لسة لغاية دلوقتي في حمام السباحة
سامح
طبعا..وهو وراه غيره..
إيمان
فين عزمي بيه بتاع زمان يا سامح.. اللي كان منى عينه ترجعله صحته عشان يخدم ربنا
سامح
يخدم ربنا !!.. هو في أكتر من كده خدمة.. ده الصبح في النادي..وبالليل سهر و حفلات
إيمان
طب اسكت..اسكت لحسن يسمعك..زمانه جاي
سامح
زمانه جاي.. لا يمكن يقدر ييجي دلوقتي..انتي ناسية حفلة امبارح واللي عمله فيها..من ساعة ما دخل و هو بيسأل عن الأكل..حاجة مش معقولة.. الواحد مبقاش طايق يشوفه
صوت عزمي
مراد .. يا ولد يا مراد .. إعمللي قهوة و حصلني عالمكتب
إيمان
عزمي بيه ..عزمي بيه
(يدخل عزمي)
سامح
عزمي بيه اسم الله عليه.. عزمي بيه اسم الله عليه..يا مفرحنا يا مهنينا.. عزمي بيه يا كنتينة
عزمي
كنتينة!!.. عزمي بيه يا كنتينة!! .. غايته.. صباح الخير يا إيمان
إيمان
صباح النور يا عزمي بيه
عزمي
ها.. حضرت الحسابات بتاعة الشركة يا سامح
سامح
شوف سعادتك.. بعد جهد جهيد وعناء شديد.. قدرت اني أخلص حسابات الشركة كلها في أسبوع واحد
عزمي
وريني كدة..دا إيه العظمة دي كلها ياأستاذ سامح..إيه الجمال ده..إيه اللي انت عامله ده !!
سامح
في إيه بس يا سعادة البيه
عزمي
ده كلام فاضي يا أستاذ..ده تهريج.. إيه ده يا أستاذ سامح ياأبو المفهومية..إيه اللي قدامي ده.. مرفت نصحي ليها بند مصروفات ب 5000 جنيه.. دي زودتها قوي..إزاي توافق على صرف الفواتير دي؟!
سامح
ماهو يا عزمي بيه..
عزمي
عارف يا سامح ..عارف..هاتقوللي كانت محرومة...وعشان تخدم ربنا لازم ماتكونش محرومة من حاجة..بس ده كلام فارغ
إيمان
يا عزمي بيه ما تحرمش حد من حاجة..وكمان مرفت ليها في الشركة زي أي واحد فينا
عزمي
بس أنا المدير العام للشركة
سامح
مدير عام إيه..ومدير خاص إيه..يا سعادة البيه..يا سعادة البيه..احنا لما نزلنا الدنيا تاني..كان الموت عادل معانا..ولما وظفنا في الشركة ماربطش الوظيفة بحقوقنا أو مرتباتنا..وفهمنا إن المناصب دي مجرد شكليات
إيمان
يعني هو مراد الراجل الغني لما طلب إنه يبقى فقير..وبقى مراد الفراش بتاع الشركة..معناه إنه ياخد فلوس أقل مننا
سامح
بالعكس دا مرتيه زيك و زي سناء و زيي أنا
إيمان
كلنا زي بعض.. لإن معروف إن الموت بيساوي الروس ببعضها..
عزمي
خلاص خلاص.. آدي إمضتي على الميزانية.. هي .. هي الساعة كام دلوقتي يا إيمان؟
إيمان
الساعة دلوقتي 12 .. لكن حضرتك بتيأل ليه؟؟
عزمي
عشان ميعاد الدوا..
سامح
دوا..دوا إيه تاني..ما انت بقيت زي الفل اهه
عزمي
لا أبدا..دا مجرد مقوي علشان صحتي تبقى حديد..على فكرةأنا عازمكم على حفلة النهاردة
سامح
تاني..
إيمان
لا يا سيدي..أنا مش هاروح معاك حفلات تاني
سامح
داانت كنت زي اللي عمره ماشاف أكل قبل كده
صوت عمال
ارحمنا يا عزمي بيه..انجدنا يا عزمي بيه..حرام عليكم..عيالنا هتجوع..وبيوتنا هتتخرب
صوت مراد
كل واحد يروح بيته دلوقتي..عزمي بيه مشغول جدا
عزمي
إيه ده..إيه الهيصة دي..العمال مالها ؟؟
إيمان
أصل سامح طرد نص العمال..
عزمي
طرد نص العمال..إزاي يا أفندي ماتقوليش حاجة زي دي..
سامح
إإإإ...إحنا بس حبينا نعمل لسيادتك مفاجأة
عزمي
مفاجأة.. تطرد نص العمال و الشغل يقف تقوللي مفاجأة
إيمان
شغل إيه اللي هايقف..دا سامح وسناء جابوا مكن جديد هيخلينا نستغنى عن نص العمال اللي عندنا
سامح
وبكده هنزود الإنتاج و نوفر المصاريف
عزمي
والمكن الجديد جه امتى و إزاي ؟؟!!
إيمان
إتعاقد عليه سامح و سناء في رحلتهم الأخيرة لسويسرا
عزمي
عال قوي.. كويس خالص..دلوقتي بقىننزل نشوف المكن الجديد
صوت العمال
يا عزمي بيه ارحمنا...ده حرام ...ده ظلم...ده مايرضيش ربنا أبدا
((يدخل مراد))
مراد
يا عزمي بيه العمال هيكسروا الدنيا برة
عزمي
يعني يكسروا الدنيا...ايه هي فوضى...مفيش قانون مفيش بوليس
مراد
شوية...دول برضه أصحاب عيال يا بيه...يرضيك أنهم يتشردوا
عزمي
مايتشردوا ياأخي .. وأنا مالي..هو أنا مسؤول عنهم..
صوت العمال
يا عزمي بيه يا عزمي بيه..ارحمنا دا احنا غلابة..اعمل معروف يا بيه
عزمي
الظاهر إن الذوق مش نافع معاكم ..أنا هاطلبلكم البوليس
صوت العمال
عوضنا على الله.. ربنا عالظالم و المفتري
(( يخرج مراد ))
صوت الملاك
الخير..الخير فين يا ناس..فين الرحمة ..فين الإحساس..جيّالكم..جيّالكم و دراعاتي مفتوحة ليكم..جيّالكم بالحب أنادلكم..جايا أسأل عن الحنان..جايا أشوفك ياأستاذ..مش جايا أدينكم ولا أحاسبكم..جايا أفكركم وأصحي ضمايركم...لسة...لسة عايشين والقناع على عينكم..؟؟ لسة نايمين والسنين بتمر عليكم؟ الخير يا ناس بينادي عليكم ..محتاج نظرة من عنيكم..أدوني لمسة من قلوبكم ..ادوني لمحة من حياتكم..أنت وإنتي وانتم كلكم...كام مرة عملتم خير..كام مرة خدمتم الغير؟؟شايفة وخايفة..شايفة إنكم كدابين..وخايفة تبكوا لما تنتهي السنين
سامح
عزمي بيه ..عزمي بيه..اتفضل ..اتفضل سعادتك عشان تشوف بنفسك المكن الجديد..وتمتع عينيك..هتبقى أحسن شركة..
عزمي
احنا بالطريقة دي هيبقى عندنا mass production
سامح
لا ياسعادة البيه ..احنا هننتج أزياء برضه..مش الفاكشان اللي بتقول عليه ده
عزمي
ماس بروداكشان...يعني انتاج ضخم..كله أو توماتيك
سامح
آه توماتيك يعني..يالله بينا طيب عشان سيادتك تشوف الماكينات التوماتيكي..اتفضل يا بيه
((يخرج عزمي وخلفه سامح وإيمان))وتدخل سناء
سناء
مراد..مراد..أنت يا مراد يا مراد
مراد
أيوة يا ست هانم..أيوة أنا جاي أهه
سناء
إيه ده يا مراد..إيه الدوشة اللي برة دي
مراد
ده أصل سامح بيه طرد نص العمال يا ست هانم..
سناء
طيب وفين مرفت يا مراد
مراد
لسة ماجاتش يا ست هانم .. أي خدمات؟؟
سناء
آه ..مفيش حد سأل عليا؟
مراد
لأ ياست هانم
سناء
طيب روح يا مراد..يا مراد طب مفيش حد اتصل بيا في التلفون يا مراد؟
مراد
لا يا ست هانم..
سناء
مراد..طب مفيش جوابات وصلت عشاني؟
مراد
لا يا ست هانم ..مفيش
سناء
طب خلاص...روح يا مراد...مراد.. مفيش؟..
مراد
لا مفيش يا ست هانم..مفيش حد سأل عليكي في التلفون ..ومفيش حد بعت جوابات ..ومفيش حد عايز يشوفك
سناء
إيه ده يا مراد..أنا ماكنتش هاقول كده..أنا كنت هقول مفيش عندك قهوة؟
مراد
قهوة..آه عندنا يا ست هانم..
سناء
طب روح اعملي قهوة يا مراد..مراد عاوزاها بوش..يا مراد..مراد بلاش لاكاعة يا مراد..مراد بحبح إيدك في البن شوية..مراد..خلاص روح يا مراد
مراد
خلاص يا ست هانم..أروح..راجعي نفسك يا ست هانم ...لو رحت لغاية هناك مش هرجع تاني..
سناء
ما قلتلك خلاص روح يا مراد بقى..
((يخرج مراد))
صوت من الخارج
قلتلك هاقبلها يعني هاقبلها..
مراد
محدش موجود هنا
صوت
أنا سامعك بتكلم الست سناء..اوعى كده من سكتي بقولك ((ويدخل))
رجل
انتي اللي ممكن تضيفيني ياست هانم
سناء
انت مين؟؟
رجل
أنا ..أنا زكريا يا ست هانم..عامل هنا عندكم في الشركة
سناء
عامل عندنا؟؟..وايه اللي جابك هنا..عايز ايه؟؟
رجل
أصل سامح بيه ربنا يعمر بيته طردني من الشركة يا ست هانم
سناء
آه..هو انت من العمال اللي احنا استغنينا عنهم ...احنا خلاص..جبنا بدالكم مكن جديد
الملاك
زكريا شاريكم..مش بايعكم..يالحب جالكم ..بالإخلاص خدمكم..نسيتي..نستي يا سناء...فين وعودك؟
صوتها في الماضي
إديني فرصة تانية ..فرصة واحدة بس وأنا هثبت لك إني هبقى كويسة
الملاك
فين وعودك يا سناء...فين عهودك ..فين الصفاء
سناء
مستغنيين عن خدماتك يا أخي
الرجل
خلاص يا ست هانم..مستغنيين عن خدماتي..فاكرة..فاكرة ياست هانم..فاكرة من 3 سنين
الملاك
بس هييجي اللي أقوى من ظلمكم..يشوف شركم..ويشوف حقدكم..هاتندمي..هاتندمي يا سناء لما ييجي اللي هايحاسبكم
((تخرج))
الملاك
بس ساعتها الندم مش هاينفعكم
مراد
ياست هانم..يا ست هانم..القهوة اللي طلبتيها يا ست هانم
سناء
طيب حطها عندك يا مراد..وروح إنت
((يخرج مراد وتدخل إيمان))
إيمان
ايه ده.. إنتي هنا يا سناء؟؟جيتي إمتى؟؟
سناء
من شوية صغيرة..
إيمان
مالك يا سناء..باين عليكي تعبانة..فيه حاجة؟
سناء
لا أبدا..مفيش حاجة يا إيمان..مفيش حاجة..
((يدق جرس التليفون))
سناء
ألو..أيوة يا فندم..مين سعادتك..أيوة ..أنا سناء..الطلبية ..أيوة..الطلبية جاهزة..بس لسة الشحن..أهم حاجة إن حضرتك تدفع القسط الأخير..عشان نقدر نشحنها.. وطبعا مش هوصي حضرتك الفايدة ..والعمولة بتاعتي...أوكيه مع السلامة يا فندم
((تدخل مرفت وهي في غاية الشياكة))
سناء
مرفت..مش معقول ..إنتي مرفت
مرفت
للدرجة دي شكلي اتغير؟؟
إيمان
ايه الحلاوة دي..كنتي فين؟؟..عزمي بيه سأل عليكي..
مرفت
يعني هي الدنيا اتقلبت...قولولي الأول الطقم ده أنا جايباه بحوالي 1200جنيه بس
سناء
هايل...يجنن
إيمان
مبروك يا مرفت ... ألف مبروك
سناء
المهم الله يخليكي..اتفضلي على مكتبك خلصي الأوراق المستعجلة وحضري البوستة عقبال لما أشوف الطلبية المشحونة أخبارها ايه
مرفت
حاضر يا ستي..آديني هدخل أشوف الشغل أهه
((وتخرجان))
مراد
استنى ياعم هي وكالة من غير بواب
الرجل
يا أخي سيبني كده...عايز أقابل هنا أي حد.. ((ويدخل))
إيمان
الله ..إنت اللي رجعك تاني
الرجل
هو أنا يا ست هانم جيت هنا أوّلاني لما هاجي هنا تاني؟؟
إيمان
مش إنت؟؟...
الرجل
لا مش أنا
إيمان
أمال إنت تبقى مين؟
الرجل
أنا خدام سعادتك..مخالي...زبون شركتكم من مدة طويلة ودايما باخد بالجملة من عندكم..
إيمان
المهم ...عايز ايه دلوقتي؟؟
الرجل
الموضوع وما فيه يا ست هانم..إن الأستاذ عزمي كان متفق معايا إني آخد بضاعة بالجملة على عشر أقساط...وبعد كدة جه وقال لأ...نخلّيها على سبع أقساط..
إيمان
ماترغيش كتير...المهم...أنا عايزة المهم..
الرجل
المهم إنه غيّر كلامه..وبعد ما خدت البضاعة...طالبني بالفلوس المتجمدة على بعضها.. ولما ماقدرتش أدفع...رفع عليا قضية..وجه المحضر وحجز على كل اللي حيلتي...وده طبعا مايرضيش ربنا يا ست هانم
إيمان
و أنا أعملك إيه...ما هي الفلوس دي لوكانت اشتغلت كانت جابتلنا أرباح..
الرجل
وأنا بس أقدر أعمل ايه..وأجيب منين؟...
الملاك
يعمل ايه ويجيب منين..افتكري...افتكري يا إيمان..إنك من الموت اترحمتي... وارحميه.. افتكري إنك في يوم اتظلمتي وانصفيه ...يظهر إنك نسيتي...فاكرة...فاكرة يا إيمان...
صوت
لو الفلوس هتبقاش مشكلة في حياتي هعرف ربنا واخدمه كويس
الرجل
إعملي معروف يا هانم كلمي عزمي بيه وقولي له يصبر عليا شوية...
إيمان
اتصرف يا أخي...استلف...إن شالّه تبيع هدومك
الرجل
أبيع هدومي..وإمشي عريان؟؟...ياست هانم...يا ست هانم العين بصيرة والإيد قصيرة
إيمان
طب استنى لما إيدك تطول وابقى تعالى..مراد...يا مراد..تعالى ورّي الراجل ده باب الخروج منين..
مراد
لو سمحت اتفضل برة يا سيد...انت تعبت الست هانم..
الرجل
فعلا أنا تعبتها خالص ..خليتها تفكر في الرحمة والعطف..ماعدش يجي منه...متشكرين يا ست هانم...متشكرين ياسي مراد أنا عارف الباب لوحدي يا حبيبي
الملاك
هيروح..هيرح بدموعه للي يرحم...صحيح هو اتظلم..لكنه لا يمكن يظلم ...شيطان السرقة هيحاربه دلوقتي ..لكنه مش هيستسلم فيه ناس بتستفيد من الماضي ودروسه .. وفيه ناس تانية بتنسى الماضي وبرجلها تدوسه
((يدخل عزمي وسامح فيجد إيمان حزينة))
سامح
اتفضل يا عزمي بيه
عزمي
إنتي قاعدة هنا يا إيمان؟؟
سامح
مالك ..شكلك متضايق وبوزك قرّب يخبط في اللي حواليكي
إيمان
أنا متضايقة ؟؟!!أبدا..ده أنا مبسوطة خالص ...ده أنا حتى هطق من الإنبساط ..معقول مش باين عليا؟؟
عزمي
إيه يا إيمان حصل ايه بس؟؟
إيمان
الراجل اللي إنت حجزت عليه باين اسمه...اسمه
سامح
أيوة أيوة ده..أنا عرفه
عزمي
مين؟؟ الراجل ده لازم أأدّبه عشان يبقى عيرة لغيره..ومحدش يفكر مجرد تفكير انه يتأخر عن دفع القسط يوم واحد ...ولا حتى ساعة واحدة
إيمان
دي مش شغلتي..أنا شغلتي أشرف على قسم الأزياء الجاهزة وبس..مش مقابلة العملاء
سامح
خلاص بقى يا ستي ...خدي الكشوف دي بقى واكتبيها على المكنة
إيمان
إيه دي؟؟
سامح
دي عناوين الناس اللي هنحجز عليهم..
عزمي
بسرعة شوية يا إيمان ..الله يخليكي
الملاك
مستعجل ليه يا عزمي بيه على المصايب...زي كتير من الناس بأرخص تمن تبيع الحبايب ...وإنت يا سامح علشان الفلوس بتدبح قلب الغلابة والمساكين....فاكر..فاكر يا سامح إنت كنت عايز أيه؟؟
صوت سامح
يا سلام..ياسلام لو الناس تحترمني هبقى انسان تاني خالص
الملاك
وعشان الناس تحترمك لازم تحبك ..وعمر الناس ماهتحترمك طول ما انت مش بتسامح
((دخول مراد بالدوسيهات ثم مرفت و سناء ))
عزمي
هي الساعة معاك كام دلوقتي يا سامح؟؟
سامح
مش ممكن جات ساعة الموت
عزمي
مش معقول ...مش معقول لسة شوية
مرفت
العشر سنين خلصوا لأ ...لازم فيه غلطة في التاريخ
سامح
ساعتي مش مضبوطة ...لأ...لسة فيه عشر دقائق ..لسة باقي وقت
إيمان
كمّل جميلك يا سي موت
سناء
إدينا الله يخليك كمان ساعة
مراد
ساعة واحدة عشان خاطرنا
سامح
النتيجة غلط..الساعة غلط..التاريخ غلط فيه غلطة ولو في يوم واحد ..لسة فاضل يوم.. لسة فاضل يوم
الفصل الثالث
عزمي
حد يصدق ان ده كان ممكن يحصل؟؟...12 سنة مرت دلوقتي على رجوعنا للحياة تاني .والموت مايجيش
سناء
فعلا..حاجة غريبة..كان المفروض إنه ييجي بعد 10 سنين زي ماتفق معانا
مرفت
أكيد نسي!!!
إيمان
نسي..نسي أيه..هو ده عمره ينسى
سامح
يمكن احنا نسينا وغلطنا في الحساب
مراد
ده تبقى مصيبة لو كان لسة فاكر
مراد
لا..لا التواريخ مضبوطة ..يظهر انه نسي
مرفت
طيب..بما إننا لسة هنعيش تاني ..والموت نسي...فأنا عاوزة نصيبي في الشركة
سامح
أنا لازم آخد أكبر نصيب في الربح لإني طول عمري وأنا تعبان في عمل حسابات الشركة ولولايا ..كانت الضرائب زمانها خدت نص الرصيد الموجود عندنا
مراد
العدل يا أساتذة..أنا اللي لازم آخد أكبر نصيب لإني أنا اللي خادمكم ومريحكم..
سناء
إنتوا نسيتوا إن أنا العقل المدبر في الشركة وللا إيه ؟؟
إيمان
مانسيناش...بس اوعي تنسي إن اللي عمل قسم الأزياء الجاهزة في الشركة هو أنا..وياما تعيت فيه
عزمي
يا حلاوة يا حلاوة ..ونسيتوا إن أنا صاحب الشركة والمدير العام
سامح
يا جماعة..احنا هنتخانق ولا ايه؟؟
مرفت
لازم المصنع يتقسم بشكل يريح الكل ويرضي الكل
إيمان
مدام كلكم مش متفقين..يبقى أنا لوحدي اللي هبيع الأسهم بتاعتي في البورصة..عن إذنكم
عزمي
إيمان ..إيمان..إسمعيني بس ....سناء..الله يخليكي روحي وراها وحاولي تقنعيها إنها تغير اللي في مخها ده
سناء
حاضر يا عزمي بيه ..حاضر
سامح
استني يا سناء..أنا جاي معاكي ..أنا فاهم إيمان كويس ..وهعرف إزاي أقنعها .. ((ويخرجان))
مرفت
ربنا يسهل ويقدروا يقنعوها .. ((يدخل هاني))
مراد
أنت ..تاني!!!!
مرفت
الراجل ده جه هنا يجي 50 مرة وكل مرة يقول إنه أول مرة ييجي هنا
عزمي
أنت مين يا جدع أنت..الرجل الأخضر..ستيف أوستن..بس..عرفتك..يبقى أنت المرأة الخارقة
هاني
أنا هاني
مراد
هاني...طب اوعى تيجي هنا تاني
مرفت
ممكن تقول لنا ...أنت حكايتك معانا ايه..؟؟؟
هاني
حكايتي معاكم هي حكايتي مع كل الناس ...حكاية الإنسان على مر الزمان
عزمي
ده بيقول شعر
هاني
يقول ربي...أن سمعتم صوته فلا...
مرفت
ييه عارفين..عارفين...متشكرين قوي يا سيدي ..زهقنا من الكلام ده
مراد
بقولك ايه ...تشرب حاجة سخنة ولا باردة ؟؟
عزمي
أحسن..أحسن برده...المشاريب تضر صحتك
مرفت
ممكن نفهم إنت عايز ايه بالضبط...!!!؟؟؟
هاني
أنا بجمع تبرعات لجمعية خيرية
مرفت
جمعية خيرية..؟!
هاني
المعطي المسرور ..يحبه الرب
عزمي
آه ..هو أنت منهم ؟ هتقعد تقولي الفقرا دول يبقوا أولاد المسيح وأخوة الرب ..بقولك ايه ..الكلام ده يا حبيبي ميدخلش دماغي اتفضل يا حبيبي برة..يلاّ اطلع برة
مرفت
يلا يا سيدي ورينا عرض اكتافك
مراد
ليه كده يا جماعة القسوة دي..طب صدقوني صعب عليا..خد ..خد يا..تعالى..آخ..معييش فكة..شوف..انت تفوت علي الشهر الجاي.. زي دلوقتي..أكون فكيت
الملاك
لغاية امتى..لغاية امتى هتفضلوا قفلين قلوبكم عن فعل الخير لغاية امتى هتفضلوا في ظلم الغير..الخير جايلكم ..يترجى كل واحد فيكم يترجى كل واحد ..يقرب منه..يلمسه..يقوله كلمة يهمسه الفرصة جاية لغاية عندكم بتناديكم ..اسمعوها..ييجي بكرة
"لاني دعوت فأبيتم ومددت يدي وليس من يبالي بل رفضتم كل مشورتي ولم ترضوا توبيخي فانا ايضا اضحك عند بليتكم واشمت عند مجئ خوفكم واذا جاء خوفكم كعاصفة واتت بليتكم كالزوبعة واذا جاءت عليكم شدة وضيق حينئذ يدعونني فلا استجيب، يبكرون إليا فلا يجدونني لأنهم ابغضوا العلم ولم يختاروا مخافة الرب ولم يرضوا مشورتي ورذلوا كل توبيخي فلذلك يأكلون من ثمر طريقهم ويشبعون من مؤامراتهم"
ملاك الموت : - لكل منا قناعاَ يرتديه يعيش به بين الناس . قناعاً يخفى وراءه الحقد والكبرياء … الشهوه والاستهزاء … الفشل والخداع… قناعا يحجب عنه الرؤيا . يرفض ان ينزعه ليظهر من خلفه الحقيقة. لكن سوف يأتي ذلك اليوم التى تسقط فيه الاقنعة رغماً عنا … زي الناس دول …اللي كل واحد منهم عاش في الحياة وهو لابس قناع
عزمي :- نرتدي اقنعتنا ونسير على الطريق
ايمان -: خطواتنا حائرة ضائعة
سناء : - ونتمسك بالاقنعة الزائفة التى نرتديها .. نضحك بها على انفسنا وعلى الحياة ومن فيها
عزمي -: نضحك والقلب في احزانه غريق ونكتشف ان شعور رؤوسنا قد بيضتها السنين
سناء -: وفجأة … تسقط الاقنعة … وتسقط احزاننا … ونتعجب مما جنيناه
سامح :- ونغمض عيوننا ونفقد الحس والادراك
مراد -: وتسقط دموعنا ونسقط معها بلا حراك .
سناء
ونعود ونسأل… اين الاحلام ؟
سماح
أين الاماني ؟
إيمان
أين الصديق ؟ …. كلها اوهام ضاعت ….اختفت
مرفت
سقطت مع الاقنعة …. على قارعة الطريق
مراد
ونمضى… نمضى كما مضى السابقون وتمحونا السنون .
سامح
ولا يبقى لنا اثر مثل الدخان … نختفى كلاشئ .
عزمي
نعم .. حياتنا في هذه الارض … خيال … دخان … بعدها نعود.
ملاك الموت
لأنك تراب … وإلى التراب تعود …
الجميع
انت مين ؟ ..
ملاك الموت
أنا اللي هانزع عنكم اقنعتكم .
الجميع
أقنعة !!!
م. الموت
عشتوا حياتكم زي مانتم عايزين .. معملتوش حسابكم ان هاييجي يوم وتقابلوني ..
الجميع
أنت مين ؟ …. أنت مين ؟…. أنت مين ؟ ….
م.الموت
أنا الموت … الموت اللي كلكم كنتوا نسيتوه … لكن..( الليلة تطلب نفس كل واحد منكم)
الجميع
لا …. مش مستعدين … مش مستعدين … مش مستعدين ….
الفصل الأول
ويدخل الجميع في دهشة وخوف ... الاضاءة خافتة....
سامح
الله ... احنا فين ياحضرات ؟ …..
مرفت
أنا عمري ماجيت هنا قبل كدا !!!!!
ايمان
انا خايفة اوي
مراد
مكان مخيف جداً
سناء
مع انه مكان مانعرفهوش … لكنه جميل .. جميل جداً … سانتيما خالص
عزمي
أيه ..؟ سانتيما خالص !!!!
مراد
ياله قوام … واحد يشوف لنا احنا فين … انا مش فاضي ..لازم اكون في البيت دلوقتى … العيال مستنينى ع. العشا .
سناء
وانا زمان بابي ومامي قلبوا عليا الدينا دلوقتى …
سامح
أنا بقى زمان الحتة بتعتى مرتاحين منى اخر راحة . اصل انا بقى الواد المشرط بتاع المنطقة ..
عازمي
اصحابي على القهوه مستنينى .. زمانهم دلوقتى بيقولوا أنى انسحبت من دوري الطاولة …
ايمان
وأنا ..أنا لازم اكون في المستشقى دلوقتى … كل دقيقة بتمر بتتسبب في موت عيان .
مراد
كل دقيقة بتمر بتكلفنى آلاف الجنيهات .
مرفت
انا بقى الوقت مايفرقش معايا .. ومعتقدش ان في حد ممكن يفكر انه يسأل عنى
مراد
ياجماعة … واحد فيكم يتحرك .. يعمل حاجة … انا مش فاضي .. العيال
عزمي
مستنيني على العشاء
مراد
بالضبط .. ولازم دلوقتى اكون في البيت
سامح
في البيت … هاأأأأأأأأو … أنا بقى والحمد لله ماليش بيت … أي حارة في الحتة بتعتنا تبقى بيتى … وأي رصيف فيها يبقى سريري …
سناء
أنت بتنام على الرصيف … الله … دى حاجة اورجينال خالص … سنتيما جداً ..
سامح
اورجينال ؟!!!!..... أورجينال يعنى ايه .!؟؟؟؟ أهو انتى اللي سيتين اورجينال … ما تتكلمي عربي زينا يابت انتى يابت …
سناء
يامامي انت بتزعق في كدا ليه ؟
ايمان
سناء … سناء فكري مش كدا …
سناء
الدكتورة ايمان ! انتى ايه اللي جابك هنا .؟
ايمان
مش عارفة … لكن اللي اعرفه دلوقتى ….
عزمي
اللي اعرفه دلوقتى … انى لازم اكون على القهوة .
مرفت
ياترى المشرفة في الملجأ … بتقول علي ايه دلوقتى …
سامح
ملجأ… هو حضرتك بلا قافيه ساكنه في ملجا؟ …
مرفت
أنا مرفت … وعيت ع الدنيا لقيت نفسي في بيت ملجأ
سامح
وأنا بقى .. سامح … سامح وبس .. معرفش سامح ايه .. لكن الناس بيقولوا عليا سامح الفهلوي .. الواد اللي هوه … الفلنتينوه يعنى ..بتاع كله
مراد
هاهاها..مراد ساويريس… من رجال الاعمال… وصاحب شركة استيراد وتصدير .
عازمي
أنا بقى عزمي سيحا عزمي ..من رجال المعاشات .. والدي يبقى المرحوم سيحا عزمي كان باشا سابق ..أما جدى بقى ..
مراد
أنت هاتحكلنا تاريخ حياتك … يااخي .. يااخي انا مش فاضي . … العيال
سامح
ايه مستنينك على العشا…
مراد
لاء … زمنهم ناموا ..
سناء
أنا ابتديت اخاف …عايزة اروح…مامي عملالي بارتي النهادرة …وعازمه فيه كل اصحابي ..وبابي اشترالي بالمناسبة دى حتة فستان … انما ايه ..يجنن …
عزمي
اه … سانتما خالص …
مراد
مافيش حد فيكم معاه بطارية .. ولاعة… كبريت حتى … على الاقل نعرف احنا فين .
سامح
أنا معايا كبريت
مراد
وساكت من الصبح!!!!
عزمي
بنى ادم غريب
سامح
(يشعل سامح الكبريت) الله ... دا مكان مهجور .زي مانكون في صحرا
مرفت
صحرا!!!
ينطفأ الكبريت ويشعل غيره
عزمي
انت بتقول ايه
ايمان
وايه اللي هايجبنا مكان زي دى!!
مراد
الراجل دى بيخرف
سامح
كفاية دوشا...استنوا ... انا سامع صوت رجلين...
( ينطفئ الكبريت ويولع ثاني )
يدخل موكب جنائزي من اربعة افراد حاملين نعش يصلوا إلى خشبة المسرح ويتوسطونه
سامح
دى جنازة !!!...
ايمان
دا اكيد المريض اللي عملناله عملية امبارح .. كانت حالته خطيرة... الله يرحمه ...
مرفت
انا عمري مارحت جنازة قبل كدا
سناء
جنازة !!! الله منظر شاعري جداَ .. سانتما خالص
(يقترب الموكب )
عزمي
اسألهم ياسامح...يمكن يدلونا على السكة ...
سامح
لو سمحتوا ... احنا مش عارفين جينا هنا ازاي ...
مرفت
طب ممكن توصلونا ... معاكم عربية ؟؟؟؟
ايمان
هما مش بيردوا علينا ليه ؟
مراد
طب الجنازة دى بتعات مين ؟؟؟؟
سامح
دول كأنهم مش شايفنا ... ولا سامعنا ...
سناء
زي مانكون ارواح بالنسبة لهم ..
( يغادر الموكب المسرح ويدخل ملاك الموت )
ايمان
مين دا ؟؟
مرفت
وانا ايش عرفني
سناء
يامامي دا شكله يخوف اوي ....
عزمي
بالعكس ياانسة .. دا حتى شكله رقيق ... سانتما خالص ...
مراد
هو ده وقت هزار .. ياللا... واحد فيكم يسأله عن اسمه ... خلينا نخلص ..
سامح
ماتسأله انت يافتك ...
مراد
فتك .. طيب .. انا هاسأله .. هو انا يعنى هاخاف منه وللا ايه .. هاسأله .. تعال معانا ياستاذ عزمي ...
عزمي
لا ياعم روح انت لوحدك ...
سامح
ياراجل روح معاه ماتبقاش جبان كدا . ...
ايمان
ياجماعة حد فيكم يروح يتكلم معاه .. مش معقول كدا ..
سناء
ماتروح تكلمه يااستاذ مراد
عزمي
ايه يااستاذ مراد .. روح كلمه .
مراد
لأ .. انا ماليش دعوى بالحكاية دى .
سامح
احسن حاجة ان اكبر واحد فينا هو اللي يكلمه ...واكبر واحد فينا سناً هو الاستاذ عزمي
مراد
فعلاً ... الاستاذ عزمي هو اكبر واحد فينا .. كلمه يااستاذ عزمي ... عشان خاطرنا ... ايوه كلمه يالا....
عزمي
ياجماعة انا راجل كبير وصحتى ماتستحملش ...
الجميع
عشان خاطرنا يااستاذ عزمي .. عشان خاطرنا ...
عزمي
حاضر .. حاضر ... ممكن لو سمحت ياأخ تقولنا احنا فين ؟؟؟
م. الموت
هاهاها.....انتو لسه بتسألوا .. انتو هنا في نهاية الطريق ... اخر الخط ... المحطة الاخيرة ...
سامح
حلو اوي المحطة الاخيرة دى ياسكلانس ... يعنى ايه بقى عشان انا مش فاهم !!!
م. الموت
يعنى انتو كلكم حياتكم انتهت ... وهاتقعدوا هنا لغاية لما يجي يوم الحساب .. لانكم متم .
الجميع
متنا !!!!!؟؟؟؟؟؟
مرفت
مش ممكن ؟؟؟
مراد
مش معقول !!!
عزمي
متنا ..
سامح
طب ازاي ؟؟؟
ايمان
امبارح....
سناء
امبارح كان عيد ميلادي
ايمان
رحت المستشفى ..
سناء
طلبت من بابي يجيبلي عربية جديدة ...
ايمان
لفيت على كل العيانين ... واحد منهم كان تعبان اوي .. بصلي وقالي...
سناء
قالي .. مانتى عندك العربية بتاعتي استعمليها ... قلت له لأ ياسيدي انا عايزة عربية لي لوحدي .وتكون احمره ... وبعدين ...
ايمان
وبعدين ... حسيت بشوية تعب ... اخدت قرص اسبرين ونمت .
سناء
وصرخت وزعقت .. ورميت الزهريات على الارض .. علشان تيجي الحاجة اللي انا عايزاها . لكن ...
ايمان
لكن مافتكرش انى كنت تعبانى لدرجة انى اموت ...
م.الموت
الموت يا دكتورة..مابيستناش الواحد لما يتعب أو يمرض الموت بيخبط على الباب في أي وقت.. لأنه يأتي كلص .. فاسهروا اذا لأنكم لا تعرفون الوقت ولا الساعة
سناء
ولما جبت العربية فرحت بيها خالص ...
م. الموت
لانك انسانة مستهترة .. ركبتى العربية مع انك مابتعرفيش تسوقي .. فاتقلبت بيكي وجيتى هنا . ..
سناء
ماكنتش اعرف ان العربية اللي طلبتها هيكون فيها نهايتي ..
عزمي
انا بقى مش فاكر أي حاجة من اللي حصلي .
مرفت
لكن انا فاكره كويس ..
عزمي
افتكرت دلوقتى... كان المفروض اننا نكمل الدوري بتاع الطاولة . وكنت مصمم ...
مرفت
كنت مصممة انى اتخلص من حياتي ...
عزمي
صحيت من بدري ولبست هدومي ..
مرفت
ونزلت روحت الاجزاخانة .. واشتريت حبوب منومة
عزمي
حسيت انى مش قادر اقف على رجليه .. وبعد كدا
مرفت
بعد كدا ماحستش بحاجة خالص .. ولما فقت ...
عزمي
ولما فقت .. لقيت نفسي في المستشفى .. ولكن الدكاترة طمنوني ...قالولي كلها يومين ..
مرفت
كلها يومين وتخفي ... ولكن انا مكانش عندي أمل ..
عزمي
ماكنش في فايدة ..
مرفت
بس احسن حاجة .اننا موتنا .
عزمي
ياسلام .. مبسوطه اوي حضرتك ..
مرفت
على الاقل الواحد استريح من الدنيا ... من الناس .. وعرف مصيره ونهايته ... الدنيا مافهاش غير التعب ..
م. الموت
عمرك يامرفت ماهتلاقي الراحة... لانك كنتى بعيدة عن ربنا ونسيتى صوته اللي قال "تعالوا إلينا ياجميع المتعبين والثقيلي الاحمال وانا اريحكم "
عزمي
أحنا متنا ؟؟؟ لأ .. مش ممكن نكون موتنا.
م. الموت
أحنا موتنا .. بتجمع .. خوفك من الموت بيخليك تجمع ..
عزمي
ماهو انا مش ممكن اكون مت من غير مااستعد.
م. الموت
ايوه ...تستعد .. تصلي لربنا ... تبكيله شوية ... وتوعده انك اول ماتخف هاتوب وترجعله .. وبمجرد ان ربنا يشفيك..ترجع تاني للقهوه والطاولة ... وشلة الانس اياها وعموماً اذا كنت مش مصدق انك مت ... اتفضل اقرا.. اقرا وسمعهم ... نعيك في الجرنال ...
عزمي
انتقل إلى الامجاد السماوية .. المرحوم المقدس .. عزمي سيحة عزمي ، نجل المرحوم سيحة عزمي الباشا السابق، وحفيد المغفور له سيحة سيحة عزمي .. وحفيد حفيد عزمي سيحة سيحة عزمي....وشقيق كل من خيرت سيحه عزمي من اصحاب العمارات الكبيرة اوي وسمير سيحه عزمي من اصحاب الفلوس الكتيرة اوي ، ورأفت سيحه عزمي من اصحاب الاراضي الكبيرة اوي، وابن عمر عزمي فهمي من الاعيان وعزمي باشا من البشوات وعزمي بيه من البهوات وعزمي افندي من الافندية ، وعزمي حاف من الحفيين ، وابن خالة كلا من عزمي نخلة وعزمي البلد وعزمي الخيمة وعزمي بقرية عزمي وعزمي بميت عزمي وعزمي ببلدة عزمي وعزمي بكفر عزمي وعزمي بكوم عزمي ... هذا وستشيع الجنازة باذن الله في تمام الساعة التاسعة مساءا والعزاء بمنزل 19 بحارة عزمي المتفرع من زقاق عزمي الواقع في شارع عزمي من امام عمارة عزمي ... ولاعزاء السيدات عشان بيعيطوا أو يولولوا وبيعملوا حاجات مش كويسة .... سقط سهواً .. ان المرحوم كان قريب كل من حسبله وخيرالله ونعمةالله وسعدالله وكله على الله . نعي اصدقاء القهوة :ـ "الوداع ياعزمي .. .ياصديق العمر ياعزمي يالي كنت اجدع واحد في شلتنا ياابو العزايم .. مين من بعدك هايدفعلنا الحساب ياعزومة .. يارب تخش الجنى يارب.. يارب تروح النعيم يارب .
م. الموت
وطبعا الدعوتين اللي في الاخر دول مش هاينفعوك ...
مراد
انا بقى لا يمكن اكون مت... كل اللي انا فاكره .
سامح
كل اللي أنا فاكره ..إني كنت راكب عربية مع راجل مقاول كبير
مراد
كنت من اسكندرية بعد ما عملت صفقة هناك... صحيح
سامح
صحيح .. انا كنت اول مرة اشوف المقاول دى ... لكنه وعدني انه هايشغلنى معاه ويمكن ...
مراد
يمكن كنت سايق العربية بسرعة شوية .. مع ذلك انا حاولت ..
سامح
حاولت اقنعه يهدى السرعة شوية.. وغلبت اقوله ..يابيه .. ياسعادة البيه .. احنا كنا هانروح في شربة مايه .. بصلي وقالي ...
مراد
ماقدرش .. ماقدرش اهدي السرعة ... العيال مستنينى على العشاء .. ثم ان العربية
سامح
العربية كانت ماشية زي الطيارة .. وبعد شوية ..
مراد
وبعد شوية .. حسيت انى تعبان ... وكنت تعبان فعلاً ... عنيا غمضت ثانية . . ثانية واحدة بس ...بس كدا ماعتقدتش اموت .
م. الموت
ماتعتقدش ... واحد سايق العربية في الطريق الصحراوي ... بسرعة 180 كم وينام من كتر التعب على الدريكسيون .. وبعد كدا تقول انك ماتعتقدش انك تموت ..
سامح
هو انت اللى قتلتنى ياظالم ... انا لازم اخلص عليك..
م. الموت
تخلص عليه..؟؟ ما خلاص.. انتوا الإثنين حياتكم انتهت.. وهنا بقى بالذات مفيش حد بياخذ حقه بإيده.. انتوا خلاص.. كلكم كانت ليكوا فرصة على الارض لكن.. مافيش ولا واحد منكم استثمر وزناته.. كل واحد منكم راح ودفن وزنته في التراب.. ( ولأجل هذا اخذت منكم الوزنه.. وستعطى لأخر.. لأن كل من كان له يعطى فيزداد.. وأما من ليس له فالذي عنده يؤخذ منه) كلكم كنتوا عبيد بطالين.. ((وستطردوا إلى الظلمة الخارجية.. هناك يكون البكاء وصرير الاسنان ))
مراد
كلنا هانروح الجحيم ..
سناء
النار .. يامامي ..
سامح
ياما اتمنيت الشر لغيري طول حياتي
ايمان
ياما كتبت ادوية ممنوعة أو منتهية عشان الفلوس ..
مرفت
نسيت ربنا وسرقت فلوس من الملجأ ..
عزمي
انا عمري مارضيت ربنا مرة واحدة في حياتي
مراد
ضيعت عمري كله ونسيت ... نسيت افكر في ربنا ولو للحظة .
سناء
كنت مستهترة وماكنش بيهمني حاجة في الدنيا غير نفسي وبس ..
سامح
زرعت الرعب والخوف في قلوب الناس اللي عرفتهم .
ايمان
اتخليت عن الفقراء ورفعت سعر الكشف .
مرفت
هربت من الملجأ وبعدت عن ربنا
م. الموت
كلكم كنتوا بعيد عن ربنا. .. بقلوبكم وعقولكم .. برغبتكم وإرادتكم .. انتم اللي اخترتوا طريقكم ومشيتوا فيه لحد النهاية .
عزمي
ياااه .. بس لو ربنا أداني صحة .. كنت عرفت اخدم واعيش معاه .
مراد
لو ربنا ما خلقنيش غنى ... كنت بقيت راجل فاضي . .. كنت لقيت وقت اروح فيه الكنيسة .
سناء
لو كان ربنا يرزقني بأم غير امي .. أكيد ماكنتش هابقى مستهتره
سامح
لو كان ربنا خلقنى انسان زي بقيت الناس .. وكان ليا عيلة واصحاب .. اكيد كنت هابقى انسان تاني .
ايمان
ياه ... لو ربنا يدينى فرصة ثانية..
مرفت
لو كان ربنا خلقنى في ظروف احسن من كدا .. كنت اكيد هابقى انسانة ثانية .
مراد
لو كان ادالي وقت ..
عزمي
الوقت كان ممل .. لو كان ربنا اداني ولد يمكن كنت اتسلى بتربيته ورحت الكنيسة.
سناء
ياسلام يااخي ... لو كانت ظروفنا احسن من كدا كنا رحنا الجنة على طول.
سامح
لو ..
م. الموت
قولوا .. كملوا ... كملوا اعذاركم .. بس للاسف ... الاعذار دى كلها مش هاتنفعكوا ... لان فات اوانها .
سامح
بصراحة بقى .. دا حرام .. مش خسارة الواحد يموت كدا على طول ... حرام ..حرام .
م. الموت
حرام ...!!! هو انت مش كنت طول عمرك مستني انك تموت ....
سامح
اموت ... صحيح ... صحيح انا طول عمري كنت بتمنى انى اموت لكن ... لكن كان عندي امل ... ايوه ... ولسه عندي أمل جوه في قلبي ... كنت كل يوم احلم بشجرة عالية ... عالية اوي فروعها في السما... وانا بحاول اطولها ... بحاول امسك أي غصن فيها ... اتعلق بيه ... لكن مش قادر ... مش قادر لان الشجرة كانت عالية فوق .. فوق اوي ... وانا تحت .. وعيون الناس وضحكهم .. ونظراتهم الخبيثة كانت بتطاردني في كل حته .. كلهم .. كلهم كان محيرهم سؤال واحد .. ياترى انت ابن مين يا سامح .. ابوك مين ... اسمه ايه ... وامك فين .. انت لقيط ياسامح .. لقيط ... لقيط ... لقيط ...
م. الموت
اد ايه الانسان دا جاحد ونساي ... رغم انك نسيت ربنا لكن ربنا مانسكش .. "لان كل شعره من رؤوسكم محصاة " .. فاكر المقاول اللي بعتهولك ربنا عشان تشتغل معاه وتكسب من مهنة شريفة ... كان ممكن تسافر معاه .. وتعيش في بلاد ثانية .. وتبدي حياتك من جديد وسط ناس ماحدش فيهم يعرفك .. لكن انت اللي مارضتش
سامح
مارضيتش ... عارفين المقاول ده كان عايز يشغلنى معاه بكام ؟ بعشرة جنيه في اليوم !! انا مش أقل من زمايلي .. اللي الواحد فيهم كان بيخبط الخبطة من دول ويطلع بكام باكو في يوم واحد .. ياخسارة باواد ياسامح .. كان فاضلك همسه وتخبط خبطتك .. لكن خبطة الموت كانت اسرع .
مرفت
لكن برده احنا اتظلمنا في حياتنا .. لا أب ولا أم .. ولا عيله .. وانا .. انا كل البنات حواليا كانت بتلبس وتخرج وتتفسح وتحط مكياج .. إلا انا .. إلا مرفت نصحي . كانت المشرفة قاسية علينا اوي .. .كان كل يوم يقف واحد من المشرفين في الملجأ .. ويكلمنا ويقولنا ينبغي ان نبحث عن السلام الداخلي ... ينبغي ان نبحث عن الحب .. هيهي..وهما كانوا ابعد ناس عن السلام .. وأخر ناس ممكن تعرف يعنى ايه حب ...
عشان كدا سرقت .. ايوه سرقت الملجأ .. وهربت .. وخرجت للدنيا .. ولقيت ناس كلهم وحوش .. مجردين من الادمية .. غيلان مسعورة ... غابة الكبير فيها بياكل الصغير .. كل واحد فيهم ماشي بمبدأ دوس على اللي تقدر عليه .. والعب باللي تكسب بيه .. ساعتها الدنيا ضلمت في عينيا .. مابقتش شايفة حتا تحت رجليا .. كل حاجة حلوة ... بقت مرة ... النور ... النور نفسه بقى ضلمة .. ضلمة
م. الموت
هو دا عيبك .. انك دايما كنتى بتبصي في القزى اللي في عيون غيرك ..مفكرتيش ابدا انك تبصي للخشبة اللي في عينك انتى... المشرفة كانت قاسية.. المشرفين ماكانوش بيعروفوا معنى الحب ... طب وانتى ... انتى عرفتى معنى الحب أو معنى السلام... لو كنتى عرفتيه ماكنتيش سرقتي الملجأ وهربتى .. ماكنتيش نسيتى ربنا
مرفت
انا نسيت ربنا لأنة هو نسيني ..
م. الموت
ربنا ما بينساش حد .. لكن احنا اللي بننساه أو بنتناساه... وبعدين نرجع نقول انه نسينا ..
سناء
لو سمحت يا أونكل موت .... انا مظلومة خالص .. ربنا رزقنى بأم مافيش حاجة تهمها إلا المظاهر وبس .. كل يوم سهر وحفلات وعزومات ... بابي كان بالنسبة لي آلة بتجيب فلوس وبس ... مالقتش قدامي حد يرعاني أو يوجهنى .. وطبعاً كنت مغرورة .. طلعت لقيت نفسي غنية .. بابي راجل مهم اوي ... فوق .. فوق .. والناس كلها تحت .صغيريين ...صغيرين اوي .. كنت عايشه بين السما مع النسور .. النسر اللي كان بيخوف الناس كلها كنت ساكنه معاه فوق .. لكن في لحظة .. في لحظة لقيته بيزقنى بيوقعنى تحت . . ولقيت نفسي بصرخ واقول .. مش عايزه انزل تحت .. عايزة افضل فوق .. عايزة افضل فوق ..فوق..
م. الموت
بالرغم انك كنتى عايشه لوحدك .. لكن ربنا برضوا ما سبكيش .. فاكره .. فاكره زميلتك في المدرسة اللي ربنا بعتهالك علشان تساعدك وتقربك منه ... كانت دايما بتكلمك عنه وعن الكنسية وعن الاجتماع .... ولكن غرورك وكبريائك خلاكي تتريقي عليها وعلى لبسها. وطردتيها من البيت .. انتى كنت عايشة فوق مع النسر .. كنت بتشوفي الناس صغيرين اوي .. ونسيتى .. نسيتى ان الناس هما كمان كانوا بيشفوكي صغيره اوي ..
سناء
يعنى ايه ؟ خلاص !! خلاص هافضل هنا لوحدي ...بعيدة عن بابي ومامي واصحابي .
م. الموت
انتى عمرك ما هاتبقى لوحدك ..في تلاتة أصدقاء ليكي كانوا معاكي.. الاول سابك في اول الطريق .. ودا كان المال .. والثاني سابك على باب القبر .. ودول كانوا الناس اللي ودعوكي .. والثالث .. اللي عمره ما هيسيبك هو اعمالك..
سامح
سيبك منهم وخليك معاي انا ... دول كلهم كانوا عايشين عيشه مفيش بعد كدا وجايين دلوقتى يعيطوا ... لكن انا .. انت تقدر تقَدّر ظروفي كويس ... لانك عارف المجتمع اللي كنت عايش فيه ... والفقر اللي جابني هنا
مراد
لأ .. الفقر مش سبب يخليك تبعد عن ربنا .. اوعوا تبصولي على اني غني يعنى لازم ارضي ربنا .. لأ..انتوا ما تعرفوش العيال وبلاويهم .. دا غير مراتي .. وربنا رزقني بحتة حماة .. متعتها الوحيدة في الدنيا انها تنكد علي الصبح وبليل .. كله كوم ,وأبنى الكبير اللي يادوبك واخذ بكالوريوس فنون جميلة .. وعايز يتجوز .. كوم ثاني ..
عزمي
هو جيل الايام دي كدا .. شباب فاسد.. مابيفكرش غير في الجواز وبس ..
مراد
ولا الواد الثاني ياسيدي ... عامل فيها متدين وبتاع كنيسة .. بيروحها كل يوم .. لكن مابيرضاش يحضر القداس .. مش عارف بيقعد يعمل ايه .. ولا الواد بتاع الثانوية العامة .. كتب خارجية .. دروس خصوصية .. مجموعات تقوية .. ظهري اتقطم من كتر مصاريفه .. ومع ذلك بقاله اربع سنين في الثانوية العامة ومخدهاش .. ولا البنات ... البنات يااستاذ عزمي .. كلهم من عينة الست سناء ..
سناء
حلويين كدا ياانكل .. مافتكرش ..
عزمي
اذا كانوا صحيح زي سناء .. يبقوا اكيد زفتيما خالص ..
مراد
ماكنش عندي أي وقت اروح فيه الكنسية.
م. الموت
المشكلة الازلية اللي بتتحججوا بيها دايما ( الوقت ) . ..ماكنش في وقت .. مع انك لو طلبوك في التليفون عشان تعمل صفقة في اسوان وانت في اسكندرية .. هاتسافر في اقرب طيارة .. المشكلة مش مشكلة وقت .. المشكلة مشكلة قلب .. قلبك كان فين .. جاوب .. اقولك انا .. العالم كان عايش في قلبك .. لانك زي ماقال الكتاب .. ( لان كل ما في العالم.. شهوة العيون .. وشهوة الجسد... وتعظم المعيشة.) وانت كنت بتدور على تعظم المعيشة ... عايز تليفزون ملون .. وفيديو . .وستيريو.. وتكييف .. عايز العمارة تبقى اثنين .. عايز الرصيد يزيد في البنك .. وسط دا كله ربنا ماكنش له وجود في حياتك .. نسيته خالص .. عايش في العالم وشهواته جواك .نسيت كلام الانجيل " العالم يمضى وشهواته تزول .. أما من يصنع ارادة الله فهذا يثبت إلى الابد" .. وفضلت تكبر وتعلى وتكنز في المخازن. .. .زي الغنى الغبى بالضبط .. وقلت لنفسك " يانفسي افرحي لان لكي خيرات كثيرة موضوعة لسنوات عديدة " فاستحقيت انك تسمع الصوت اللي قال " ياغبي .. في هذه الليلة تطلب نفسك منك "
ايمان
انا اكثر واحدة مظلومة فيكوا .. مافيش حد عاش الظروف اللي انا عشتها .. اوعوا تقولوا علي اني علشان دكتورة يبقى لازم ارضي ربنا .. لأ.. انا اتربيت في اسرة صغيرة فقيرة .. ابويا كان موسيقار مغمور.. تعب معاي كتير لحد ما دخلت الجامعة.. وفي يوم ..وفي يوم رجعت البيت لقيت العود واقع من ايده على الارض وايده ماسكة الريشة .. جريت واترميت في حضنه .. ومسكت ايده ورفعتها فوق وسبتها .. لكنها فضلت جامدة ... كان خلاص .. كل شئ انتهى .. ومات ...مات
مرفت
طب ومامتك ..
ايمان
ماما ماتت وهي بتولدني ..
سناء
ياحرام .. مسكينة .. انتى حكايتك عاملة زي روايات يوسف وهبي بالضبط..
ايمان
كان لازم اروح الكلية الصبح.. واشتغل بعد الظهر عشان اغطي مصاريفي .. كافحت .. ونجحت واتخرجت ..وفتحت عيادة .. لكن ماكنش في عيانين بتجيلي .. عارفين ليه .. عشان الكشف كان بخمسة جنية ... يا بلاش .. والغريبة لما عملت الكشف بعشرين جنية .. ابتدت الناس تجي ... ولما عملتها بخمسين جنية .. ابتدت الناس تزيد اكتر واكتر .. ولما رفعت الكشف لغاية ميت جنية بقت العيادة مش مكفية .. والحجز عندي لشهورقدام
عزمي
اسألينى انا عن الدكاترة وبلاويهم .. العيان بيكشف في العيادة بسعر... العادي بسعر والمستعجل بسعر ثاني .. وفي البيت بسعر.. الدكتور منهم يعمل العملية ببنج بكذا .. ومين غير بنج بكذا..
ايمان
المريض لما كان بيدفع ميت جنية بيحس انه هايخف .. بالرغم من كدا مقدرتش استمر في النجاح كتير ..
م. الموت
نجاح الشهرة والمجد .. عمرك في يوم ما بصيتى للعيان عشان تشفيه .
ايمان
ابداً .. انا ضيعت عمري كله عشان هدف واحد ... هو اني ارسم باستمرار الامل على وش كل مريض.
م. الموت
كملي الجملة يادكتورة .. انتى كنت بترسمي الامل على وش كل مريض غنى
ايمان
طب ما الفقرا كانت قدامهم العيادات الخيرية .. يعنى انا ماليش دعوة بيهم .
م. الموت
البيت والظروف اللي عشتي فيها كان مفروض تخلي في قلبك حب ناحية الفقراء .
ايمان
صدقنى انا حاولت اكون انسانة كويسة .. لكن ...
م.الموت
لكن... كلمة جديدة اخترعها العصر الحديث عشان كل واحد يبرر بيها تصرفاته .. لكن الظروف.. لكن الوقت .. لكن المشغوليات .. لكن الفلوس.. ونسينا .. نسينا ربنا.. نسينا الدينونة .. نسينا يوم الحساب ..
عزمي
كل الكلام اللي هما قالوه ده كلام فارغ.. مافيش حد فيهم عاش وشاف اللي انا شوفته... دا مافيش مرض إلا وجاني .. ومافيش دوا الا وخدته .. ومافيش دكتور ألا وروحتله ... رحلة المرض اللي انا عشتها .. كانت رحلة كلها الم .. ثلاثين سنة .. ثلاثين سنة وانا بتعذب .. ثلاثين سنة وانا محروم .. كنت اجيب الاكل من بره .. لكن ماقدرش اكل ... الاكل ممنوع.. الشرب ممنوع .. الخروج ممنوع .. كل حاجة ممنوعة.. عشت في غربة .. وكانت القهوة هي عزائي الوحيد.. وسريري كان هو شريكي في رحلة المرض .. والحرمان كان صعب اوي علي .. حتى العيال ربنا حرمني منهم .. حاولت اعيش في فرح وهنا .. لكن قلبي كان بينزف الم .. الم
م.الموت
إنت صحيح كنت مريض في آخر أيام حياتك.. لكن انت نسيت أيام زمان..أيام شبابك والشلة إياها.. كل يوم سهر لوش الصبح..تشرب سجاير مايضرش..تشرب خمرة مافيش مانع..وكانت النتيجة المرضاللي عانيت منه لما كبرت..انت جنيت نتيجة غلطتك انت.. كلكم.. كلكم جنيتوا نتيجة أخطاؤكم.. ربنا خلقكم أحرار و إداكم فرصة تستغلوا فيها حريتكم..لكن انتوا..لفيتوا الحبل حوالين رقابكم لغاية لما خنقتوا نفسكم بيه..انتوا ضيعتوا فرصتكم بإديكم ..
سامح
طب إدينا فرصة تانية
مرفت
أه.. فرصة واحدة بس
مراد
نزلني الأرض تاني
عزمي
بس في ظروف غير دي
إيمان
وأنا هاثبت لك إني هابقى إنسانة كويسة
سناء
أيوة.. الله يخليك يا أونكل موت
سامح
يا سلام لو تديني عيلة
مرفت
هاتشوف أنا هاعمل إيه
مراد
لو تنزلني الأرض من غير مسؤوليات
عزمي
و لو تديني صحتي
سناء
ولو تديني أم غير أمي و مبقاش متدلعة و مستهترة
مرفت
ولو تديني حرية أعمل اللي أنا عايزاه
مراد
آآآآخ...لو أكون فاضي و ماعنديش بيت ولا عيال
إيمان
و لو الفلوس ماتبقاش مشكلة في حياتي
سامح
ولو الناس تحترمني
سناء
الله يخليك نزلنا الأرض
عزمي
ولو شهر واحد
مراد
ولو أسبوع واحد
مرفت
ولو يوم واحد
إيمان
ولو ساعة واحدة
سامح
ومتخفش مش هنقول إن في كوسة عندكم هنا
م.الموت
و لا ميت فرصة هتنفعكم.. ومع كدة أنا.. أنا هاديكم فرصة..مش يوم ولااتنين زي ما انتوا بتطلبوا.. مش شهر ولا شهرين زي ما انتوا بتحلموا.. لأ ..هاديكم فرصة عشر سنين.. بس بشرط.. هاتكونوا طول المدة دي تحت عنيا..هاجمعكم كلكم في شركة واحدة..هي شركة الأزياء الجاهزة..... أنتي يا عزمي.. هاترجعلك صحتك.. و هاتكون المدير العام للشركة.. وانت يا مرفت هتبقي حرة.. تلبسي و تخرجي و تتفسحي زي كل اللي في سنك وهتبقي سكرتيرة الشركة..أما انتي يا إيمان .. الفلوس مش هتبقى مشكلة في حياتك لأنك هتكوني مسؤولة عن قسم الأزياء..و انت يا سامح..الناس كلها هتحترمك..وتنسى إنك لقيط و هتبقى المديرالمالي للشركة.. أما انتي بقى يا ست سناء.. فهتنسي الدلع و تبقى ليكي شخصية مستقلة و هتكوني العقل المدبر في الشركة.. مفضلش غيرك يا مراد بيه..أنت بقى هتكون فاضي خالص زي مانت عايز... و مش هيكون عندك مسؤوليات..لأنك هتكون فراش الشركة..
واللآن..فلتقف عجلة الزمان.. وتعود عقارب الساعة إلى زمن النسيان..و تنفك قيود الموت وتنفتح القضبان..ولتسكن الحركات..وليصير الكل خليقة جديدة.. و سيحكم بيني و بينكم في النهاية الزمان..و بعدها.. أنت بلا عذر أيها الإنسان..أنت بلا عذر أيها الإنسان ..
الفصل الثاني
إيمان
إيه ده يا سامح ..انت هنا ز عزمي بيه قالب عليك الدنيا
سامح
طيب قولي صباح الخير الأول..
إيمان
صباح الخير يا سيدي
سامح
إيه يا إيمان جرى إيه ..الدنيا اتهدت ولا إيه
إيمان
عزمي بيه عايز يعرف أرباح الشركة وصلت كام
سامح
طب و أنا دخلي إيه في الموضوع ده
إيمان
يا سلام عليك يا أخي..أنت نسيت إنك المدير المالي للشركة
سامح
أهو ده الشيء الوحيد اللي مش ممكن يتنسي..بس هو فين عزمي بيه.. ماهو مش معقول كمان إن المدير العام يراجع أرباح الشركة في حمام السباحة
إيمان
إيه ده..هو لسة لغاية دلوقتي في حمام السباحة
سامح
طبعا..وهو وراه غيره..
إيمان
فين عزمي بيه بتاع زمان يا سامح.. اللي كان منى عينه ترجعله صحته عشان يخدم ربنا
سامح
يخدم ربنا !!.. هو في أكتر من كده خدمة.. ده الصبح في النادي..وبالليل سهر و حفلات
إيمان
طب اسكت..اسكت لحسن يسمعك..زمانه جاي
سامح
زمانه جاي.. لا يمكن يقدر ييجي دلوقتي..انتي ناسية حفلة امبارح واللي عمله فيها..من ساعة ما دخل و هو بيسأل عن الأكل..حاجة مش معقولة.. الواحد مبقاش طايق يشوفه
صوت عزمي
مراد .. يا ولد يا مراد .. إعمللي قهوة و حصلني عالمكتب
إيمان
عزمي بيه ..عزمي بيه
(يدخل عزمي)
سامح
عزمي بيه اسم الله عليه.. عزمي بيه اسم الله عليه..يا مفرحنا يا مهنينا.. عزمي بيه يا كنتينة
عزمي
كنتينة!!.. عزمي بيه يا كنتينة!! .. غايته.. صباح الخير يا إيمان
إيمان
صباح النور يا عزمي بيه
عزمي
ها.. حضرت الحسابات بتاعة الشركة يا سامح
سامح
شوف سعادتك.. بعد جهد جهيد وعناء شديد.. قدرت اني أخلص حسابات الشركة كلها في أسبوع واحد
عزمي
وريني كدة..دا إيه العظمة دي كلها ياأستاذ سامح..إيه الجمال ده..إيه اللي انت عامله ده !!
سامح
في إيه بس يا سعادة البيه
عزمي
ده كلام فاضي يا أستاذ..ده تهريج.. إيه ده يا أستاذ سامح ياأبو المفهومية..إيه اللي قدامي ده.. مرفت نصحي ليها بند مصروفات ب 5000 جنيه.. دي زودتها قوي..إزاي توافق على صرف الفواتير دي؟!
سامح
ماهو يا عزمي بيه..
عزمي
عارف يا سامح ..عارف..هاتقوللي كانت محرومة...وعشان تخدم ربنا لازم ماتكونش محرومة من حاجة..بس ده كلام فارغ
إيمان
يا عزمي بيه ما تحرمش حد من حاجة..وكمان مرفت ليها في الشركة زي أي واحد فينا
عزمي
بس أنا المدير العام للشركة
سامح
مدير عام إيه..ومدير خاص إيه..يا سعادة البيه..يا سعادة البيه..احنا لما نزلنا الدنيا تاني..كان الموت عادل معانا..ولما وظفنا في الشركة ماربطش الوظيفة بحقوقنا أو مرتباتنا..وفهمنا إن المناصب دي مجرد شكليات
إيمان
يعني هو مراد الراجل الغني لما طلب إنه يبقى فقير..وبقى مراد الفراش بتاع الشركة..معناه إنه ياخد فلوس أقل مننا
سامح
بالعكس دا مرتيه زيك و زي سناء و زيي أنا
إيمان
كلنا زي بعض.. لإن معروف إن الموت بيساوي الروس ببعضها..
عزمي
خلاص خلاص.. آدي إمضتي على الميزانية.. هي .. هي الساعة كام دلوقتي يا إيمان؟
إيمان
الساعة دلوقتي 12 .. لكن حضرتك بتيأل ليه؟؟
عزمي
عشان ميعاد الدوا..
سامح
دوا..دوا إيه تاني..ما انت بقيت زي الفل اهه
عزمي
لا أبدا..دا مجرد مقوي علشان صحتي تبقى حديد..على فكرةأنا عازمكم على حفلة النهاردة
سامح
تاني..
إيمان
لا يا سيدي..أنا مش هاروح معاك حفلات تاني
سامح
داانت كنت زي اللي عمره ماشاف أكل قبل كده
صوت عمال
ارحمنا يا عزمي بيه..انجدنا يا عزمي بيه..حرام عليكم..عيالنا هتجوع..وبيوتنا هتتخرب
صوت مراد
كل واحد يروح بيته دلوقتي..عزمي بيه مشغول جدا
عزمي
إيه ده..إيه الهيصة دي..العمال مالها ؟؟
إيمان
أصل سامح طرد نص العمال..
عزمي
طرد نص العمال..إزاي يا أفندي ماتقوليش حاجة زي دي..
سامح
إإإإ...إحنا بس حبينا نعمل لسيادتك مفاجأة
عزمي
مفاجأة.. تطرد نص العمال و الشغل يقف تقوللي مفاجأة
إيمان
شغل إيه اللي هايقف..دا سامح وسناء جابوا مكن جديد هيخلينا نستغنى عن نص العمال اللي عندنا
سامح
وبكده هنزود الإنتاج و نوفر المصاريف
عزمي
والمكن الجديد جه امتى و إزاي ؟؟!!
إيمان
إتعاقد عليه سامح و سناء في رحلتهم الأخيرة لسويسرا
عزمي
عال قوي.. كويس خالص..دلوقتي بقىننزل نشوف المكن الجديد
صوت العمال
يا عزمي بيه ارحمنا...ده حرام ...ده ظلم...ده مايرضيش ربنا أبدا
((يدخل مراد))
مراد
يا عزمي بيه العمال هيكسروا الدنيا برة
عزمي
يعني يكسروا الدنيا...ايه هي فوضى...مفيش قانون مفيش بوليس
مراد
شوية...دول برضه أصحاب عيال يا بيه...يرضيك أنهم يتشردوا
عزمي
مايتشردوا ياأخي .. وأنا مالي..هو أنا مسؤول عنهم..
صوت العمال
يا عزمي بيه يا عزمي بيه..ارحمنا دا احنا غلابة..اعمل معروف يا بيه
عزمي
الظاهر إن الذوق مش نافع معاكم ..أنا هاطلبلكم البوليس
صوت العمال
عوضنا على الله.. ربنا عالظالم و المفتري
(( يخرج مراد ))
صوت الملاك
الخير..الخير فين يا ناس..فين الرحمة ..فين الإحساس..جيّالكم..جيّالكم و دراعاتي مفتوحة ليكم..جيّالكم بالحب أنادلكم..جايا أسأل عن الحنان..جايا أشوفك ياأستاذ..مش جايا أدينكم ولا أحاسبكم..جايا أفكركم وأصحي ضمايركم...لسة...لسة عايشين والقناع على عينكم..؟؟ لسة نايمين والسنين بتمر عليكم؟ الخير يا ناس بينادي عليكم ..محتاج نظرة من عنيكم..أدوني لمسة من قلوبكم ..ادوني لمحة من حياتكم..أنت وإنتي وانتم كلكم...كام مرة عملتم خير..كام مرة خدمتم الغير؟؟شايفة وخايفة..شايفة إنكم كدابين..وخايفة تبكوا لما تنتهي السنين
سامح
عزمي بيه ..عزمي بيه..اتفضل ..اتفضل سعادتك عشان تشوف بنفسك المكن الجديد..وتمتع عينيك..هتبقى أحسن شركة..
عزمي
احنا بالطريقة دي هيبقى عندنا mass production
سامح
لا ياسعادة البيه ..احنا هننتج أزياء برضه..مش الفاكشان اللي بتقول عليه ده
عزمي
ماس بروداكشان...يعني انتاج ضخم..كله أو توماتيك
سامح
آه توماتيك يعني..يالله بينا طيب عشان سيادتك تشوف الماكينات التوماتيكي..اتفضل يا بيه
((يخرج عزمي وخلفه سامح وإيمان))وتدخل سناء
سناء
مراد..مراد..أنت يا مراد يا مراد
مراد
أيوة يا ست هانم..أيوة أنا جاي أهه
سناء
إيه ده يا مراد..إيه الدوشة اللي برة دي
مراد
ده أصل سامح بيه طرد نص العمال يا ست هانم..
سناء
طيب وفين مرفت يا مراد
مراد
لسة ماجاتش يا ست هانم .. أي خدمات؟؟
سناء
آه ..مفيش حد سأل عليا؟
مراد
لأ ياست هانم
سناء
طيب روح يا مراد..يا مراد طب مفيش حد اتصل بيا في التلفون يا مراد؟
مراد
لا يا ست هانم..
سناء
مراد..طب مفيش جوابات وصلت عشاني؟
مراد
لا يا ست هانم ..مفيش
سناء
طب خلاص...روح يا مراد...مراد.. مفيش؟..
مراد
لا مفيش يا ست هانم..مفيش حد سأل عليكي في التلفون ..ومفيش حد بعت جوابات ..ومفيش حد عايز يشوفك
سناء
إيه ده يا مراد..أنا ماكنتش هاقول كده..أنا كنت هقول مفيش عندك قهوة؟
مراد
قهوة..آه عندنا يا ست هانم..
سناء
طب روح اعملي قهوة يا مراد..مراد عاوزاها بوش..يا مراد..مراد بلاش لاكاعة يا مراد..مراد بحبح إيدك في البن شوية..مراد..خلاص روح يا مراد
مراد
خلاص يا ست هانم..أروح..راجعي نفسك يا ست هانم ...لو رحت لغاية هناك مش هرجع تاني..
سناء
ما قلتلك خلاص روح يا مراد بقى..
((يخرج مراد))
صوت من الخارج
قلتلك هاقبلها يعني هاقبلها..
مراد
محدش موجود هنا
صوت
أنا سامعك بتكلم الست سناء..اوعى كده من سكتي بقولك ((ويدخل))
رجل
انتي اللي ممكن تضيفيني ياست هانم
سناء
انت مين؟؟
رجل
أنا ..أنا زكريا يا ست هانم..عامل هنا عندكم في الشركة
سناء
عامل عندنا؟؟..وايه اللي جابك هنا..عايز ايه؟؟
رجل
أصل سامح بيه ربنا يعمر بيته طردني من الشركة يا ست هانم
سناء
آه..هو انت من العمال اللي احنا استغنينا عنهم ...احنا خلاص..جبنا بدالكم مكن جديد
الملاك
زكريا شاريكم..مش بايعكم..يالحب جالكم ..بالإخلاص خدمكم..نسيتي..نستي يا سناء...فين وعودك؟
صوتها في الماضي
إديني فرصة تانية ..فرصة واحدة بس وأنا هثبت لك إني هبقى كويسة
الملاك
فين وعودك يا سناء...فين عهودك ..فين الصفاء
سناء
مستغنيين عن خدماتك يا أخي
الرجل
خلاص يا ست هانم..مستغنيين عن خدماتي..فاكرة..فاكرة ياست هانم..فاكرة من 3 سنين
الملاك
بس هييجي اللي أقوى من ظلمكم..يشوف شركم..ويشوف حقدكم..هاتندمي..هاتندمي يا سناء لما ييجي اللي هايحاسبكم
((تخرج))
الملاك
بس ساعتها الندم مش هاينفعكم
مراد
ياست هانم..يا ست هانم..القهوة اللي طلبتيها يا ست هانم
سناء
طيب حطها عندك يا مراد..وروح إنت
((يخرج مراد وتدخل إيمان))
إيمان
ايه ده.. إنتي هنا يا سناء؟؟جيتي إمتى؟؟
سناء
من شوية صغيرة..
إيمان
مالك يا سناء..باين عليكي تعبانة..فيه حاجة؟
سناء
لا أبدا..مفيش حاجة يا إيمان..مفيش حاجة..
((يدق جرس التليفون))
سناء
ألو..أيوة يا فندم..مين سعادتك..أيوة ..أنا سناء..الطلبية ..أيوة..الطلبية جاهزة..بس لسة الشحن..أهم حاجة إن حضرتك تدفع القسط الأخير..عشان نقدر نشحنها.. وطبعا مش هوصي حضرتك الفايدة ..والعمولة بتاعتي...أوكيه مع السلامة يا فندم
((تدخل مرفت وهي في غاية الشياكة))
سناء
مرفت..مش معقول ..إنتي مرفت
مرفت
للدرجة دي شكلي اتغير؟؟
إيمان
ايه الحلاوة دي..كنتي فين؟؟..عزمي بيه سأل عليكي..
مرفت
يعني هي الدنيا اتقلبت...قولولي الأول الطقم ده أنا جايباه بحوالي 1200جنيه بس
سناء
هايل...يجنن
إيمان
مبروك يا مرفت ... ألف مبروك
سناء
المهم الله يخليكي..اتفضلي على مكتبك خلصي الأوراق المستعجلة وحضري البوستة عقبال لما أشوف الطلبية المشحونة أخبارها ايه
مرفت
حاضر يا ستي..آديني هدخل أشوف الشغل أهه
((وتخرجان))
مراد
استنى ياعم هي وكالة من غير بواب
الرجل
يا أخي سيبني كده...عايز أقابل هنا أي حد.. ((ويدخل))
إيمان
الله ..إنت اللي رجعك تاني
الرجل
هو أنا يا ست هانم جيت هنا أوّلاني لما هاجي هنا تاني؟؟
إيمان
مش إنت؟؟...
الرجل
لا مش أنا
إيمان
أمال إنت تبقى مين؟
الرجل
أنا خدام سعادتك..مخالي...زبون شركتكم من مدة طويلة ودايما باخد بالجملة من عندكم..
إيمان
المهم ...عايز ايه دلوقتي؟؟
الرجل
الموضوع وما فيه يا ست هانم..إن الأستاذ عزمي كان متفق معايا إني آخد بضاعة بالجملة على عشر أقساط...وبعد كدة جه وقال لأ...نخلّيها على سبع أقساط..
إيمان
ماترغيش كتير...المهم...أنا عايزة المهم..
الرجل
المهم إنه غيّر كلامه..وبعد ما خدت البضاعة...طالبني بالفلوس المتجمدة على بعضها.. ولما ماقدرتش أدفع...رفع عليا قضية..وجه المحضر وحجز على كل اللي حيلتي...وده طبعا مايرضيش ربنا يا ست هانم
إيمان
و أنا أعملك إيه...ما هي الفلوس دي لوكانت اشتغلت كانت جابتلنا أرباح..
الرجل
وأنا بس أقدر أعمل ايه..وأجيب منين؟...
الملاك
يعمل ايه ويجيب منين..افتكري...افتكري يا إيمان..إنك من الموت اترحمتي... وارحميه.. افتكري إنك في يوم اتظلمتي وانصفيه ...يظهر إنك نسيتي...فاكرة...فاكرة يا إيمان...
صوت
لو الفلوس هتبقاش مشكلة في حياتي هعرف ربنا واخدمه كويس
الرجل
إعملي معروف يا هانم كلمي عزمي بيه وقولي له يصبر عليا شوية...
إيمان
اتصرف يا أخي...استلف...إن شالّه تبيع هدومك
الرجل
أبيع هدومي..وإمشي عريان؟؟...ياست هانم...يا ست هانم العين بصيرة والإيد قصيرة
إيمان
طب استنى لما إيدك تطول وابقى تعالى..مراد...يا مراد..تعالى ورّي الراجل ده باب الخروج منين..
مراد
لو سمحت اتفضل برة يا سيد...انت تعبت الست هانم..
الرجل
فعلا أنا تعبتها خالص ..خليتها تفكر في الرحمة والعطف..ماعدش يجي منه...متشكرين يا ست هانم...متشكرين ياسي مراد أنا عارف الباب لوحدي يا حبيبي
الملاك
هيروح..هيرح بدموعه للي يرحم...صحيح هو اتظلم..لكنه لا يمكن يظلم ...شيطان السرقة هيحاربه دلوقتي ..لكنه مش هيستسلم فيه ناس بتستفيد من الماضي ودروسه .. وفيه ناس تانية بتنسى الماضي وبرجلها تدوسه
((يدخل عزمي وسامح فيجد إيمان حزينة))
سامح
اتفضل يا عزمي بيه
عزمي
إنتي قاعدة هنا يا إيمان؟؟
سامح
مالك ..شكلك متضايق وبوزك قرّب يخبط في اللي حواليكي
إيمان
أنا متضايقة ؟؟!!أبدا..ده أنا مبسوطة خالص ...ده أنا حتى هطق من الإنبساط ..معقول مش باين عليا؟؟
عزمي
إيه يا إيمان حصل ايه بس؟؟
إيمان
الراجل اللي إنت حجزت عليه باين اسمه...اسمه
سامح
أيوة أيوة ده..أنا عرفه
عزمي
مين؟؟ الراجل ده لازم أأدّبه عشان يبقى عيرة لغيره..ومحدش يفكر مجرد تفكير انه يتأخر عن دفع القسط يوم واحد ...ولا حتى ساعة واحدة
إيمان
دي مش شغلتي..أنا شغلتي أشرف على قسم الأزياء الجاهزة وبس..مش مقابلة العملاء
سامح
خلاص بقى يا ستي ...خدي الكشوف دي بقى واكتبيها على المكنة
إيمان
إيه دي؟؟
سامح
دي عناوين الناس اللي هنحجز عليهم..
عزمي
بسرعة شوية يا إيمان ..الله يخليكي
الملاك
مستعجل ليه يا عزمي بيه على المصايب...زي كتير من الناس بأرخص تمن تبيع الحبايب ...وإنت يا سامح علشان الفلوس بتدبح قلب الغلابة والمساكين....فاكر..فاكر يا سامح إنت كنت عايز أيه؟؟
صوت سامح
يا سلام..ياسلام لو الناس تحترمني هبقى انسان تاني خالص
الملاك
وعشان الناس تحترمك لازم تحبك ..وعمر الناس ماهتحترمك طول ما انت مش بتسامح
((دخول مراد بالدوسيهات ثم مرفت و سناء ))
عزمي
هي الساعة معاك كام دلوقتي يا سامح؟؟
سامح
مش ممكن جات ساعة الموت
عزمي
مش معقول ...مش معقول لسة شوية
مرفت
العشر سنين خلصوا لأ ...لازم فيه غلطة في التاريخ
سامح
ساعتي مش مضبوطة ...لأ...لسة فيه عشر دقائق ..لسة باقي وقت
إيمان
كمّل جميلك يا سي موت
سناء
إدينا الله يخليك كمان ساعة
مراد
ساعة واحدة عشان خاطرنا
سامح
النتيجة غلط..الساعة غلط..التاريخ غلط فيه غلطة ولو في يوم واحد ..لسة فاضل يوم.. لسة فاضل يوم
الفصل الثالث
عزمي
حد يصدق ان ده كان ممكن يحصل؟؟...12 سنة مرت دلوقتي على رجوعنا للحياة تاني .والموت مايجيش
سناء
فعلا..حاجة غريبة..كان المفروض إنه ييجي بعد 10 سنين زي ماتفق معانا
مرفت
أكيد نسي!!!
إيمان
نسي..نسي أيه..هو ده عمره ينسى
سامح
يمكن احنا نسينا وغلطنا في الحساب
مراد
ده تبقى مصيبة لو كان لسة فاكر
مراد
لا..لا التواريخ مضبوطة ..يظهر انه نسي
مرفت
طيب..بما إننا لسة هنعيش تاني ..والموت نسي...فأنا عاوزة نصيبي في الشركة
سامح
أنا لازم آخد أكبر نصيب في الربح لإني طول عمري وأنا تعبان في عمل حسابات الشركة ولولايا ..كانت الضرائب زمانها خدت نص الرصيد الموجود عندنا
مراد
العدل يا أساتذة..أنا اللي لازم آخد أكبر نصيب لإني أنا اللي خادمكم ومريحكم..
سناء
إنتوا نسيتوا إن أنا العقل المدبر في الشركة وللا إيه ؟؟
إيمان
مانسيناش...بس اوعي تنسي إن اللي عمل قسم الأزياء الجاهزة في الشركة هو أنا..وياما تعيت فيه
عزمي
يا حلاوة يا حلاوة ..ونسيتوا إن أنا صاحب الشركة والمدير العام
سامح
يا جماعة..احنا هنتخانق ولا ايه؟؟
مرفت
لازم المصنع يتقسم بشكل يريح الكل ويرضي الكل
إيمان
مدام كلكم مش متفقين..يبقى أنا لوحدي اللي هبيع الأسهم بتاعتي في البورصة..عن إذنكم
عزمي
إيمان ..إيمان..إسمعيني بس ....سناء..الله يخليكي روحي وراها وحاولي تقنعيها إنها تغير اللي في مخها ده
سناء
حاضر يا عزمي بيه ..حاضر
سامح
استني يا سناء..أنا جاي معاكي ..أنا فاهم إيمان كويس ..وهعرف إزاي أقنعها .. ((ويخرجان))
مرفت
ربنا يسهل ويقدروا يقنعوها .. ((يدخل هاني))
مراد
أنت ..تاني!!!!
مرفت
الراجل ده جه هنا يجي 50 مرة وكل مرة يقول إنه أول مرة ييجي هنا
عزمي
أنت مين يا جدع أنت..الرجل الأخضر..ستيف أوستن..بس..عرفتك..يبقى أنت المرأة الخارقة
هاني
أنا هاني
مراد
هاني...طب اوعى تيجي هنا تاني
مرفت
ممكن تقول لنا ...أنت حكايتك معانا ايه..؟؟؟
هاني
حكايتي معاكم هي حكايتي مع كل الناس ...حكاية الإنسان على مر الزمان
عزمي
ده بيقول شعر
هاني
يقول ربي...أن سمعتم صوته فلا...
مرفت
ييه عارفين..عارفين...متشكرين قوي يا سيدي ..زهقنا من الكلام ده
مراد
بقولك ايه ...تشرب حاجة سخنة ولا باردة ؟؟
عزمي
أحسن..أحسن برده...المشاريب تضر صحتك
مرفت
ممكن نفهم إنت عايز ايه بالضبط...!!!؟؟؟
هاني
أنا بجمع تبرعات لجمعية خيرية
مرفت
جمعية خيرية..؟!
هاني
المعطي المسرور ..يحبه الرب
عزمي
آه ..هو أنت منهم ؟ هتقعد تقولي الفقرا دول يبقوا أولاد المسيح وأخوة الرب ..بقولك ايه ..الكلام ده يا حبيبي ميدخلش دماغي اتفضل يا حبيبي برة..يلاّ اطلع برة
مرفت
يلا يا سيدي ورينا عرض اكتافك
مراد
ليه كده يا جماعة القسوة دي..طب صدقوني صعب عليا..خد ..خد يا..تعالى..آخ..معييش فكة..شوف..انت تفوت علي الشهر الجاي.. زي دلوقتي..أكون فكيت
الملاك
لغاية امتى..لغاية امتى هتفضلوا قفلين قلوبكم عن فعل الخير لغاية امتى هتفضلوا في ظلم الغير..الخير جايلكم ..يترجى كل واحد فيكم يترجى كل واحد ..يقرب منه..يلمسه..يقوله كلمة يهمسه الفرصة جاية لغاية عندكم بتناديكم ..اسمعوها..ييجي بكرة
